Nga Beogradi ka ardhur për herë të parë një akuzë për Moskën si e përfshirë në vrasjen e Oliver Ivanoviçit.
Nenad Canak, ish-kandidati për President i Serbisë dhe kreu i Lidhjes Socialdemorate të Vojvodinës, ka deklaruar për televizionin “Pink” se ngjarjet pas krimit politik në Mitrovicë shkojnë në favor të regjimit në Moskë.
“Shikojeni pak ç’po ndodh? Po rikthehet në qarkullim rregulli i vjetër i vrasjeve. Kush vret është i pari që dërgon mesazhin e ngushëllimit”, tha Çanak, i cili e ka cilësuar një “turp” vendimin e qeverisë së Kosovës për të mos përfshirë Beogradin në hetimet për vrasjen e politikanit serb të Kosovës.
“Jam i sigurtë që dora që ka shkrehur këmbëzën e armës ndodhet në moçalin kriminal të Mitrovicës së veriut dhe është natyrisht brenda ambjentit serb, por leximi politik i këtij krimi i shkon për shtat interesave të Rusisë dhe kush është pas saj”, tha Çanak. /tesheshi.com/
Politikani i njohur si properëndimor theksoi se është i çuditur se pse në deklaratën e ministrisë së Jashtme ruse flitej për zbulimin e veprave penale, ndërkohë që Moska nuk ka asnjë interes shtetëror apo juridiksion në Kosovë.
Kjo është deklarata më e fortë e bërë deri tani kaq direkt dhe hapur ndaj Moskës, ndërkohë që edhe politikanë të tjerë të opozitës kanë rrëzuar versionin zyrtar se Ivanoviçin e vranë shqiptarët. /tesheshi.com/
