Aktori dhe komediani i njohur amerikan shfrytëzoi ceremoninë e shpërndarjes së çmimeve në 2016 Emmy Awards për të folur kundër fushatës ksenofobike të Donald Trump-it.
Gjatë marrjes së çmimit për The Master of None, ai, duke bërë shaka, tha se, “pas një shqyrtimi të kujdesshëm, kishte marrë vendim që të votojë për Donald Trump-in në zgjedhjet e ardhshme presidenciale amerikane që do të mbahen këtë nëntor”.
Ansari ka ironizuar kësisoj, “Unë rekomandoj që t’i heqim menjëherë nga ceremonia të gjithë të nominuarit muslimanë dhe hispanikë”, duke iu referuar mungesës së diversitetit gjatë ndarjes së çmimeve Oscar. Duke shtuar: “Uau, kjo do të ishte shumë më e lehtë sikur të ishim në ndarjen e çmimeve të Oscar-it.”
“Mami dhe babi, e di se sapo ju falënderova, por më duhet t’ju shoqëroj përjashta. Më vjen keq. Ndërsa, America Ferrera, përpjekje e bukur ndërrimi i emrit tënd në America (duke iu drejtuar aktores hispanike)! Kë mendon se po mashtron? Jashtë dhe ti!”
Ai përdori humorin për të nxjerrë në pah realitetin qesharak të propozimit të Trump-it për ndalimin e hyrjes së muslimanëve në SHBA dhe për ngritjen e një muri në kufirin mes SHBA-ve dhe Meksikës.
Më parë, këtë vit, Ansari, i biri i dy emigrantëve muslimanë, shkroi një artikull në New York Times mbi ndikimin te familja e tij dhe te muslimanët e tjerë amerikanë të fjalimit me nota urrejtjeje të Trump-it. Ai thotë se kjo është e frikshme, e se ndikon në mënyrën se si njerëzit jetojnë, punojnë dhe luten. /tesheshi.com/
