Gjithçka ka ndodhur më datë 10 mars në orën 5 pasdite, kur Dr. Ahmed Shawky Abdelsatar Amasha u rrëmbye pasi ishte duke kaluar pikën e kontrollit policor të lagjes Nasr City të Kajros. Arrestimi u krye në dëshmi të miqeve dhe kalimtarëve të rastit. Forcat e policisë nuk kanë paraqitur ndonjë urdhërarresti e as nuk kanë dhënë ndonjë arsye për ndalimin e marrjen e tij.
Familjarët janë jashtëzakonisht të shqetësuar pasi ai nuk është kthyer në shtëpi dhe ka qenë i paarritshëm në telefon që nga momenti i ndalimit. Ankesa të shumta janë dërguar autoriteteve egjiptiane veçanërisht Prokurorit të Përgjithshëm të Kajros, Avokatit të Popullit, Kryeministrit, Ministrisë së Brendshme dhe Presidentit, për të pyetur në lidhje me fatin dhe vendndodhjen e tij. Por deri më tani asnjë përgjigje nuk është kthyer.
Dr. Ahmed Shawky Abdelsatar Amasha është një aktivist i të drejtave të njeriut, anëtar i lëvizjes opozitare “Kefaya”, si dhe një sindikalist. Ai është një anëtar aktiv i shoqatës së familjeve të të zhdukurve. Si një aktivist i të drejtave të njeriut, ai ishte duke punuar me organizatat homologe egjiptiane dhe ndërkombëtare në lidhje me dënimet e padrejta të të burgosurve politikë, të drejtat e grave, pasi shumë prej tyre përdhunohen dhe vriten nga forcat e regjimi egjiptian në fuqi. Ai nuk ishte vetëm duke bërë fushatë, por ishte gjithashtu në kontakt me familjet e viktimave të cilat ndihmuan me raportet vjetore dhe dokumentacionin e rasteve të të zhdukurve.
Dr. Amasha gjithashtu ka luajtur një rol të rëndësishëm në çështjen e gazetarit të vrarë italian, Giulio Regeni. Në Egjipt, përdorimi i zhdukjes me forcë ka si qëllim pengimin e zbulimit të shkeljeve të rënda të kryera nga regjimi dhe për të shuar të gjitha format e kritikës dhe të mospajtimit.
Rrëmbimi i Dr. Shawky është një shembull direkt i një modeli të tillë dhe rrit shqetësimin mbi fatin e qindra aktivistëve të të drejtave të njeriut në Egjipt. Sipas raportit të Amnesty International, zhdukjet të tilla janë bërë një instrument kyç i politikës shtetërore në Egjipt. Kushdo që guxon të flasë është në rrezik. Sipas një raporti të Human Rights Watch, ka pasur të pakten 164 raste të tilla vetem midis prillit dhe qershorit te 2015.
Dhe sipas Al-Nadeem Center, një OJQ Egjiptiane, 980 raste të tilla janë hasur në vitin 2016. Angazhimi i tij për të drejtat e njeriut dhe roli i tij aktiv në shoqërinë civile egjiptiane mund të ketë vënë atë në rrezik duke çuar në zhdukjen e tij që prej 2 javësh. Familja e tij kërkon ndihmë në përhapjen e lajmit me qëllim rritjen e presionit ndërkombëtar mbi regjimin egjiptian, në mënyrë që Dr. Amasha si dhe shumë të tjere si ai të kthehen pranë familjeve të tyre. /tesheshi.com/
