Nëntë takime të tjera janë luajtur mbrëmjen e së shtunës në kuadër të eliminatoreve të botërorit Rusi 2018, ku nuk kanë munguar fitoret e thella, rezultatet e papritura, e barazimet pa gola.
Tre prej këtyre takimeve kanë qenë të grupit A, e në një prej tyre është regjistruar rezultati më befasues i mbrëmjes. Në Sofje, Bullgaria ka mposhtur 2-0 Holandën, duke ia vështirësuar së tepërmi rrugën drejt kualifikimit.
Golat kanë ardhur shpejt për të zotët e shtëpisë, në minutën e 5-të dhe të 20-të, e kanë patur një autor, Spas Delev.
Të munguar në Europianin e Francës, holandezët rrezikojnë seriozisht dhe pjesëmarrjen në Botëror. Vetëm 7 pikë për ta pas pesë ndeshjesh, dy humbje e një vend i katërt.
Kryesuesit e grupit A, francezët, kanë fituar 1-3 në fushën e Luksemburgut; Suedia është ngjitur në vend të dytë me fitoren 4-0 ndaj Bjellorusisë.
Vetëm katër gola ka patur në tre ndeshjet e grupit B, por këtu të pakta janë dilemat për kryesuesit. Në vend të parë, Zvicra ka fituar ngushtësisht, 1-0, ndaj Letonisë, e tani ka 15 pikë të plota, pas pesë fitoresh.
Mbrëmje e mirë dhe për Portugalinë karshi Hungarisë; një fitore 3-0, ku dy prej golave u shënuan nga Ronaldo. Portugezët mbajnë vendin e dytë, me 12 pikë; pesë pikë më pak kanë hungarezët e vendit të tretë.
Andorra mori pikën e parë në këto kualifikuese, duke barazuar 0-0 me Ishujt Faroe.
Tani është bërë rregull: aty ku luan Gjibraltari, aty është dhe rezultati më i thellë. Për Bosnjë-Hercegovinën ka qenë si një seancë stërvitore ndaj Gjibraltarit; një ndeshje e mbyllur 5-0.
Ky takim për grupin H të kualifikueseve europiane nuk ka qenë i vetmi. Kështu, Estonia dhe Qiproja janë ndarë me një barazim pa gola mes tyre.
Në barazim, por 1-1, është mbyllur dhe përballja e Brukselit mes Belgjikës dhe Greqisë. Ndaj një prej përfaqësueseve me lojtarët më të talentuar në Europë, grekët kanë bërë më të mirën, madje gjer në minutën e 89-të kanë qenë në epërsi. Për lojtarët grekë janë nxjerrë dhe dy kartona të kuq.
Tre janë skuadrat pretenduese në këtë grup për të vajtur në Botëror, Belgjika, Greqia dhe Bosnjë-Hercegovina, përkatësisht në tre vendet e para, me 13, 11 dhe 10 pikë. /tesheshi.com/
