Aksionin e pritshëm kundër informalitetit, paralajmëruar një ditë më parë nga kryeministri Rama, Partia Demokratike në opozitë e ka pritur me rezerva. Fillimisht ishte vetë kreu Lulzim Basha që e konsideroi atë si një aksion që do ndëshkonte më të dobëtit e që nuk do cënonte aspak, sipas tij oligarët e lidhur me qeverinë.
Ndërsa sot ishte deputetja Jorida Tabaku, si anëtare e Komisionit Parlamentar të Ekonomisë që ka shprehur kundërshti për këtë aksion. Sipas saj, informaliteti në ekonomi nuk zgjidhet me aksione. Znj. Tabaku ka zgjedhur si shembull aksionin kundër vjedhjes së energjisë, ku sipas saj u ndëshkuan të vegjlit, ndërsa të mëdhenjtë e lidhur me qeverinë vijuan ta vjedhin ose mos e paguajnë energjinë.
Por nga ana tjetër, Rama merr të njëjtën shembull duke e konsideruar si sukses, pasi sipas tij aksioni kundër energjisë, arriti të shpëtojë financiarisht sistemin duke ringritur në këmbë atë drejt fitimprurjes pas shumë vitesh me humbje. /tesheshi.com/
