“Golgota” e mbi 100 emigrantëve nga Siria dhe Afganistani të cilët me javë ishin mbajtur peng në disa shtëpi të fshatit Vaksincë të Kumanovës, mbaroi sot.
Në orët e hershme të mëngjesit u zhvillua aksion i madh policor në këtë fshat, i cili kishte të bënte me shpëtimin emigrantëve të huaj që u mbajtën më shumë se disa javë në disa objekte të këtij fshati.
Policia ka arrestuar edhe disa pronarë të shtëpive ku ishin strehuar emigrantët, nën dyshimet për trafik njerëzor. Një nga të arrestuarit, sipas autoriteteve policore, kërkohej prej disa kohësh për vrasje.
Sipas Ministrisë së Punëve të Brendshme gjatë aksionit janë gjetur 128 emigrantë nga Siria dhe Avganistani si dhe vende tjera nga lindja e afërt, dhe nga bisedat e deritanishme me emigrantët ilegalë thuhet se ata kanë ardhur në Vaksincë me vetëdëshirë duke udhëtuar nga Greqia për në vendet e pasura të BE-së.
Një pjesë e emigrantëve, mësohet të kenë kërkuar strehim dhe ata do të dërgohen në qendrën për strehim të azil-kërkuesve në Shkup. Ndërkohë, një pjesë tjetër do të paraqiten para organeve hetuese për të dëshmuar lidhur me trajtimin e tyre gjatë qëndrimit ose mbajtjes nëpër shtëpitë ku ishin gjetur.
Ditë më parë, qindra emigrantë që mbahen në qendrën e pritjes në Gazi Babë, u ngritën në revoltë për shkak të mbajtjes për një kohë të gjatë pa iu mundësuar dalja para autoriteteve gjyqësore, për të dëshmuar mënyrën e tyre të mbërritjes në Maqedoni. Avokati i popullit pritet t’i vizitojë ata.
Shqetësimet për marrjen e emigrantëve si pengje e bëri një media britanike të shkruajë të dhëna prekëse ku emigrantët në mënyrë çnjerëzore torturohen dhe plaçkiten në Maqedoni.
Destinacioni i fundit i emigrantëve janë shtetet e Evropës perëndimore ndërsa Maqedoninë e shfrytëzojnë si tranzit për të arritur në destinacionet e planifikuara.
Përgatiti: Bekim Laci – tesheshi.com
