Partia Demokratike i kërkoi sot Parlamentit që të nisë procedurat për heqjen e imunitetit të deputetit Aqif Rakipi, si autorin e aksidentit të ndodhur mëngjesin e së shtunës në aksin Vorë-Tiranë, ku si pasojë humbi jetën një qytetar.
Në një deklaratë për mediat, partia më e madhe e opozitës, thotë se Rakipi rrezikon një vit burg, sipas Kodit Penal, pasi u largua nga vendi i ngjarjes.
“Neni 273 i Kodit Penal, i cili është në fuqi edhe për miqtë e Edi Ramës, dikton se Aqif Rakipi mban përgjegjësi edhe për largim nga vendi i aksidentit, përgjegjësi që në vetvete dënohet deri në 1 vit burgim.
Mbarë opinioni publik është i revoltuar se si gjithë shteti është vënë deri tani në shërbim të deputetit mik të Ramës, dhe në kurriz të viktimës. Gjithçka për ta paraqitur viktimën fajtor të aksidentit dhe fajtorin viktimë.
Largimi nga vendngjarja pas përplasjes për vdekje të shtetasit Seit Sorra, përveçse akt burracak i deputetit Rakipi, është edhe vepër e pastër penale që e rëndon pozitën e tij para ligjit”, thuhet në deklaratën e PD-së.
Në vijim, i kërkohet kryeprokurorit dhe kryetarit të Kuvendit të nisin urgjentisht proçedurat për heqjen e imunitetit të deputetit Rakipi, në mënyrë që të bëhet një hetim i plotë dhe i pandikuar mbi ngjarjen.
PD akuzon deputetin Rakipi si pikë kyçe e ndërlidhjes së Edi Ramës me trafiqet. /tesheshi.com/
