Një aksident që ndodhi të dielën në Qafën e Muzinës, aksin Gjirokastër – Sarandë, prej së cilit një fëmijë 10 vjeç humbi jetën dhe 5 persona të tjerë u plagosën, është më pakta që mund të bëjë vaki në një prej segmenteve më të rrezikshme, e që për paradoks nuk lidh fshatra, nuk është në ndonjë zonë të thellë, por tashmë që vjen vera, shndërrohet në më të ngarkuarën për shkak të fluksit të madh të automjeteve që rendin drejt bregdetit.
Është një segment që me kohë duhej zëvëndësuar, pasi rritja e fluksit i ka nxjerrë parametrat e saj jashtë normalitetit.
Pak kilometra më tutje, ka kohë që pret të përfundojë aksi i Kardhiqit, që jo vetëm shkurton distancën mes Tiranës dhe Sarandës, por dhe eliminon Qafën e tmerrshme të Muzinës.
Tani, në muajt e sezonit turistik, ndodh që aty, vargu i automjeteve të shkojë disa kilometra duke ecur me marsh të parë, nëse në krye qëllon ndonjë gërdallw e tonazhit të rëndë.
Një segment me kthesa pa fund dhe me gjerësi të pamjaftueshme për të qenë i qetë në ngarje.
Dhe paçka aksidentit të së dielës, ajo sërish duhet konsideruar aks me fat të madh që nuk regjistron më shumë viktima.
Qeveria ”Rama”, dhe jo vetëm për hatër të Koços, duhet ta kish përfunduar aksin e Kardhiqit, që ashtu pa qarkullim, në aq sa kanë përfunduar punimet, po degradon duke ia rritur dhe më tej koston.
Dhe këtë jo vetëm për të kursyer viktimat e tjera që mund të ketë Muzina me cirkun që të detyron të bësh në timon, por dhe në funksion të turizmit.
Kardhiqi tipikisht një aks që i nxjerr të ardhurat e veta. /tesheshi.com/
