Lidhur me aksidentin e ndodhur në orët e para të mëngjesit të sotëm ku humbën jetën 4 persona dy shqiptarë dhe dy italianë, bëhet me dije se në vendin e quajtur Hidrovori në Plazhin Velipojë, ka ndodhur edhe 1 aksident tjetër identik si aksidenti i sotëm me pasojë humbjen e jetës se një personi.
Nga veprimet hetimore të kryera deri tani rezulton se ky segment rrugor ku ka ndodhur aksidenti, është në ndërtim e sipër dhe në pjesën ku ka dalë mjeti nga rruga, përfundon asfalti dhe pastaj fillon dhe një kthesë prej 90 gradë përgjatë kolektorit të Hidrovorit ku në këtë pjesë rruga është e pashtruar dhe kjo kthesë është e mbushur me materiale inerte, domethënë edhe terreni është i paqëndrushëm.
Nga këqyrja e vendit të ngjarjes rezulton gjithashtu se ky segment rrugor nuk është i pajisur me sinjalistikën e nevojshme rrugore, i pandriçuar, i paasfaltuar dhe i pambrojtur për pjesën më të rrezikshme të kthesës për të njoftuar përdoruesit e rrugës për vijueshmërinë.
Gjithashtu nga kontrolli i mjetit me të cilin po udhëtonin viktimat e këtij aksidenti rezulton se gomat e pasme të mjetit ishin të tejkonsumuara ku dallohen dhe thellimet e batistradës të cilat ishin rrafshuar pothuajse deri në daljen e telave të gomave.
Viktimat janë Artemisa Peraj, 21 vjeçe, Besmir Tola, 29 vjeç, italiani Giorgio Angelo, 25 vjeç dhe një italian i dytë, emri i të cilit nuk konfirmohet ende. Makina mësohet se ka rënë në kanal në orën 02:00 të mëngjesit nga shpejtësia dhe reagimi ka qenë mjaft i vështirë për shoferin dhe pasagjerët duke humbur jetën menjëherë.
Sipas burimeve, drejtuesi i mjetit, Besmir Kola ishte i fejuar me viktimën tjetër, Artenisa Peraj dhe ata kishin caktuar 14 gushtin si ditën e dasmës së tyre.
Besmir Kola dhe Artenisa Peraj nga Kakarriqi i Lezhës së bashku me dy miqtë e tij italianë kishin shkuar në plazhin e Velipojës.
Nga Shërbimet e Policisë Rrugore po vijojnë veprimet hetimore për zbardhjen e plotë të shkaqeve të aksidentit ku katër të rinj humbën jetën. /tesheshi.com/
