Katica Çullavkova, anëtare e Akademisë së Shkencave të Maqedonisë, ka kundërshtuar idenë që fëmijët maqedonas të mësojnë gjuhën shqipe në çerdhe dhe në shkolla. Ajo e ka quajtur “krim kulturor” futjen eventuale të gjuhës shqipe në programet mësimore për nxënësit maqedonas.
“Askush nuk ka të drejtë ti obligojë maqedonasit ta mësojnë gjuhën shqipe. Ky është krim kulturor që maqedonasit të detyrohen ta përdorin një gjuhë tjetër. Sot shumë lehtë premtojmë masa ekstreme radikale, të cilat e kërcënojnë në tërësi pasqyrën identitare të shtetit maqedonas”, ka deklaruar akademikja Çullavkova për gazetën maqedonase “Veçer”.
Çullavkova i ka bërë këto komente pas paralajmërimit të liderit të opozitës maqedonase, Zoran Zaev, se nuk ka asgjë kundër që edhe fëmijët maqedonas ta mësojnë gjuhën shqipe nëpër çerdhe edhe nëpër shkolla.
