Kompania ajrore franceze Air France nuk ka bërë hapa prapa në planin e saj të ristrukturimit, edhe pse është përballur me kundërshtime të jashtëzakonshme e me protesta të dhunshme.
Alexandre de Juniac, shefi ekzekutiv i kompanisë ajrore Air France-KLM, deklaroi në një intervistë për një sërë mediash franceze, se do të vijohet ashtu siç ishte parashikuar, dhe në vitin 2016 do të shkurtohen thuajse 1.000 vende pune, si pjesë e fazës së parë të planit të ristrukturimit.
Por ai qartësoi se shkurtimet e planifikuara për vitin 2017 mund të shmangen nëse bisedimet me sindikatat përfundojnë në mënyrë të suksesshme.
De Juniac nuk e saktësoi në fakt numrin e shkurtimeve në 2016-ën, që përfshin dhe largimet vullnetare, por tha se do të ishte “më pak se një e treta e totalit”.
Air France planifikon të shkurtojë rreth 2.900 vende pune në dy vitet e ardhshme, pasi kompania gjendet në vështirësi. Plani mori dhenë pasi në fillim të muajit pilotët refuzuan propozimin për të punuar me orë të zgjatura.
Punonjësit e kompanisë ajrore Air France kanë protestuar herë pas here kohët e fundit, e në shtator ka patur dhe anulime të fluturimeve për shkak të grevave të tyre. /tesheshi.com/
