Champions League është në fazën play-off, ku mësohen skuadrat e fundit që do i bashkangjiten udhëtimit të gjatë të kësaj veprimtarie në muajt e ardhshëm.
Mbrëmë janë luajtur pesë takimet e para të play-off-it. Mes tyre, më i rëndësishmi ka qenë ai i luajtur në Bukuresht, ku Steauaja vendase ka pritur Mançester Sitin.
Por ndryshe nga çfarë mendohej, Mançester Siti ka patur një dominim të plotë, duke mos hasur thuajse asnjë rezistencë. Anglezët do të fitonin thellë, 0-5, ndaj Steauasë së Bukureshtit, por ky rezultat mund të kishte qenë akoma më shpartallues.
Ndeshja ka patur një protagonist, e ai ka qenë Sergio Aguero. Tre gola të shënuar prej tij, por dhe dy penallti të humbura. Rrallë ndodh që një futbollist të shpallet lojtari më i mirë i ndeshjes pas çuarjes dëm të dy 11-metërshave. Veçse ja që Aguero është shpallur i tillë, lojtari më i mirë i sfidës së të martës.
Argjentinasi do të gabonte në minutën e 8-të dhe të 21-të nga pika e bardhë, për të shënuar në minutën e 41-të, në të 78-tën dhe në të 89-tën. David Silva dhe Nolito ishin dy shënuesit e tjerë për skuadrën e Guardiola-s.
Në takimet e tjera, Kopenhageni mposhti 1-0 APOEL-in, Borusia e Mynshegladbahut fitoi 1-3 në Zvicër ndaj Jang Bojsit, kurse dy takime përfunduan në barazim 1-1, Dinamo e Zagrebit – Salcburg dhe Ajaks – Rostov.
Pesë sfida të tjera do të luhen sonte, për të veçuar ato mes Portos e Romës, si dhe Vilarealit e Monakos. /tesheshi.com/
