Ish-kreu i grupit parlamentar të Partisë Demokratike të Kosovës, Adem Grabovci është paraqitur në Prokurorinë Speciale të Kosovës për aferën “Pronto”.
Ai është pyetur nga prokurori Elez Blakaj dhe prokurorja Drita Hajdari bashkë me prokurorin e shtetit, Lulzim Sylejmani.
Pas marrjes në pyetje Grabovci u shpreh se është i gatshëm të pastrohet nga ky hetim.
“Jemi të gatshëm për tu pastruar dhe për të dalë e vërteta në shesh”, ishte i vetmi prononcim i Grabovcit, pasi doli nga prokuroria, duke kërkuar se për çdo gjë tjetër të drejtohemi tek avokati i tij.
Por gjatë prenocimit Grabovci ka shprehur me shaka “Do emërime erdhëm t’i bëjmë”.
Kurse avokati i tij Florent Latifi ka theksuar se Grabovci dyshohet për dy vepra penale.
“Sot i jemi përgjigjur ftesës ku edhe është marrë në pyetje”, tha Latifi.
Ai shtoi se rreth çështjeve specifike për përgjimet e ka udhëzuar klientin e tij që të heshtë.
“Unë e kam udhëzuar që të heshtë. Derisa të marrim përgjigje nga EULEX-i dhe gjykatat lidhur me publikimin e këtyre përgjimeve”, ka vazhduar avokati Latifi.
Gjithashtu ai ka theksuar se veprat penale për të cilat dyshohet Grabovci nuk mund që të vjetrohen.
“Veprat e dyshuara për Grabovcin janë kryer në vitet 2011-2012. Ne ju kemi drejtuar EULEX-it, s’kemi marrë përgjigje të saktë. Ne do t’i drejtohemi gjykatës për përgjimet në fjalë”, ka shtuar Latifi.
Gjithashtu sipas tij Grabovci është përgjigjur vetëm për biografinë e tij dhe se prokuroria mundet që t’i vazhdojë hetimet.
/tesheshi.com/
