Ushtria ruse ka zhvendosur avionë luftarakë dhe raketa hipersonike në rajonin e Kaliningradit, afër vendeve anëtare të Bashkimit Evropian dhe NATO-s.
Ministria e Mbrojtjes deklaroi se tre avionë MiG-31 me raketa hipersonike Kinzhal kanë mbërritur në bazën ajrore Chkalovsk si pjesë e “masave shtesë të parandalimit strategjik” dhe do të vendosen në “detyrë 24-orëshe”.
Në videon e publikuar nga Ministria e Mbrojtjes shihen aeroplanët që mbërrijnë në bazë, por pa raketa, të cilat me siguri janë dorëzuar në një mënyrë tjetër.
Russia has relocated MiG-31 fighters with "Dagger" missiles to the Chkalovsk airfield in the Kaliningrad region bordering Lithuania and Poland. pic.twitter.com/bA7JI891SW
— Iuliia Mendel (@IuliiaMendel) August 18, 2022
Transferimi i raketave vjen në një kohë të tensioneve në rritje midis Perëndimit dhe Rusisë për shkak të pushtimit të Ukrainës nga Moska, i cili ka vazhduar për gati gjashtë muaj.
Kaliningrad është një enklavë ruse në bregdetin Baltik, e vendosur midis Polonisë dhe Lituanisë dhe është i përshtatshëm për Moskën për të zbatuar kundërmasa kundër asaj që ata pretendojnë se është politikë armiqësore e NATO-s.
Moska kritikon dërgimin e armëve perëndimore në Ukrainë dhe akuzon SHBA-në dhe aleatët e saj për nxitjen e konfliktit.
Në këmbim, Rusia ka përforcuar forcat ushtarake në Kaliningrad, duke i armatosur me armatim më të fundit, duke përfshirë raketa të drejtuara me saktësi Iskander dhe një sërë sistemesh të mbrojtjes kundërajrore.
Ushtria ruse pretendon se Kinzhal ka një rreze veprimi deri në 2000 kilometra dhe se fluturon dhjetë herë më shpejt se shpejtësia e zërit.
Presidenti rus Vladimir Putin, i cili prezantoi raketën në vitin 2018, e quajti atë një “armë ideale” që është shumë e vështirë për t’u kapur.
Kaliningrad doli në qendër të vëmendjes në qershor, pasi Lituania vendosi të kufizojë tranzitin e mallrave në zonë përmes territorit të saj, ndërsa Rusia njoftoi hakmarrje për këtë veprim.
Megjithatë, Bashkimi Evropian vlerësoi se Lituania duhet të lejojë transitin e mallrave ruse përmes territorit të saj, me përjashtim të armëve.
Rajoni më perëndimor rus ishte pjesë e Gjermanisë deri në fund të Luftës së Dytë Botërore dhe u aneksua në Rusi në Konferencën e Potsdamit në 1945.
Ka rreth një milion banorë, kryesisht rusë, por edhe një numër më të vogël polakësh, ukrainas dhe lituanez.
Nuk dihet se sa trupa ruse janë të vendosura atje, me vlerësime që variojnë nga 9,000 deri në 200,000. /tesheshi.com/
