Shefi i grupit parlamentar të PDK-së, Adem Grabovci, i njohur në opinionin publik kosovar si “shefi i shefave” pas përgjimeve që dolën në opinion ku ai është protagonisi kryesor është munduar të tregohet patriot duke thënë se krenohet me gjakun e familjes, shokëve, miqve që kanë dhënë për të arrit deri në ditët e sotme.
Ai ka thënë se ndjehet fajtor vetëm një gjë, se ai dhe familja e tij nuk është pajtuar me padrejtësitë që i janë bërë popullit të Kosovës.
Grabovci, ka thënë se është i gatshëm që të hetohet për incizimet e vitit 2011, të cilat sipas tij, ishin pjesë e një hetimi të udhëhequr nga prokuroria e EULEX-it.
“Le të fillojë hetimi. Të jem unë objekt hetimi dhe nëse konstatohet se kam dëmtuar interesat e Kosovës, unë jam i gatshëm të jap përgjegjësi para drejtësisë. E di se jam fajtor që kurrë nuk jemi pajtuar me padrejtësitë që i janë bërë popullit tim, për të fituar lirin e Kosovës. Jam i gatshëm t’i përgjigjem drejtësisë. Respektoj shtetin tim, respektoj ligjet dhe kurrë nuk kam tentuar të dalë mbi ligjin. Jam i vetëdijshëm për përgjegjësitë e mia, nëse është vepër penale për të hapur vende të punës, unë jam i gatshëm të përgjigjem”, ka thënë Grabovci.
Ai më tej në fjalimin e tij para ligjvënësve ka thënë se deputetët, duke i premtuar votuesve hapje të vendeve të reja të punës, nëse është vepër penale pse ai ka ndihmuar të kalojnë ligjet, ndihet mirë.
“Unë them me përgjegjësi se ndihem mirë se kam kontribuuar për të kaluar ligji i Hoçës, ligji për Gjykatën Speciale”, ka pohuar Grabovci.
Konjufca: Thaçi, Veseli Grabovci, trekëndëshi kryesor i kapjes së shtetit
Por, ai që e bëri Grabovcin të flas për përgjimet është kryetari i grupit parlamentar të Vetëvendosje-s Glauk Konjufca.
Konjufca e quajti Grabovcin dorë të zgjatur të Hashim Thaçit dhe Kadri Veselit, të cilët sipas deputetit të VV-së kanë krijuar një trekëndësh që kanë shkatërruar Kosovën për interesat e tyre personale.
“Dora e zgjatur e Thaçit dhe Veselit, të cilët janë trekëndësh kryesor i kapjes së shtetit për pushtet personal. Nëse je shërbëtor i tij (Grabovcit), mos ki gajle se punë ki me gjet gjithqysh. Nuk ka lidhje a ke konkurruar, shefi i shefave të shtin në punë. Nuk ka me rëndësi a di a nuk di. Edhe nëse je i fundit ki me dal i pari. Nuk është e thënë as me ja ditë emrin e institucionit ku ke për të punuar, po mos ta ndien se këtë e di shefi i shefave”, ka thënë Konjufca. /tesheshi.com/
