Kompania më e madhe ajrore e Britanisë së Madhe, “British Airways” ka marrë një dënim prej afro 230 milion dollarësh, për shkak të cënimit të të dhënave personale të klientëve.
Dënimin iu shqiptua nga Zyra e Komisionerit të Informimit, pas raporteve të mbledhura të gjysmë milioni pasagjerëve të ”British Airways” të cilët u ankuan për vjedhjet e të dhënave.
Mediat britanike njoftuan se kjo është gjoba më e madhe ndonjëherë e lëshuar nga ky institucion.
Konsumatorët ranë pre e një faqeje mashtruese gjatë procesit të rezervimit online duke lënë detajet e tyre të udhëtimit, informacionet e kartës së kreditit dhe fjalëkalimet, gjë që pati edhe dëme në llogaritë bankare të klientëve.
Shefi i ”British Airways”, Alex Cruz tha se ishte “i habitur dhe i zhgënjyer” nga vendimi i agjencisë, por të njëjtin mendim nuk e ndajnë edhe afro gjysmë milioni përdorues të kompanisë ajrore që ranë pre e abuzimit ndaj të dhënave dhe pasurisë së tyre. /tesheshi.com/
