Ylli i një tjetër gjermani po shndrit në garat automobilistike të shpejtësisë së lartë. Nico Rosberg nuk është shpallur asnjëherë kampion bote, por duket të jetë në rrugën e duhur për t’u bërë i tillë këtë sezon.
Tre garat e sezonit të shkuar u fituan prej tij, ashtu siç janë fituar dhe këto katër të parat e kampionatit në vijim. Në timonin e një Mercedes-i të pandalshëm, Rosberg nuk njeh rivalë!
Nico ka fituar dhe garën e sotme, të zhvilluar në Soçi të Rusisë. E ka kryesuar atë nga fillimi gjer në fund, pa u ngacmuar nga askush. 100 pikë të plota për të në kryesimin e këtij kampionati.
Gara e Soçit e ka patur të gjithë emocionin, të gjithë intrigën, në xhiron e parë. Rusi Kvyat i Red Bull-it e ka goditur dy herë nga prapa Ferrari-n e Sebastian Vettel-it, duke sjellë tërheqjen e gjermanit. U duk më tepër një incident i kërkuar, i qëllimshëm, sesa një gabim në pilotim.
Me makinën e sigurisë në pistë, një pjesë e pilotëve shfrytëzojnë mundësinë për ndërrimin e gomave. Më tej do të shohim një Hamilton që do të shpërthejë me njëvendëshen e tij Mercedes, duke kaluar nga vendi i dhjetë në radhën e parë.
Gara pati momente të mërzitshme, me disa parakalime në prapavijë. Williams-i u paraqit mirë me dy pilotët e tij, ndryshe nga ç’ngjau me ata të Red Bullit-, që në dallim nga tre garat e para, treguan nivel të ulët sot. Paraqitje të mirë bëri dhe piloti i vetëm i Ferrari-t në pistë, Kimi Raikkonen.
Spikati dhe McLaren-i, me Alonso-n dhe Button-in që morën pikët e para.
Në fund të garës, Rosberg e kaloi i pari finishin, i ndjekur nga Hamilton e Raikkonen. Shtatë pilotët që plotësuan dhjetëshen e parë qenë në radhë, Bottas, Massa, Alonso, Magnussen, Grosjean, Perez dhe Button.
Rosberg e kryeson klasifikimin e përgjithshëm të pilotëve me 100 pikë. Hamilton e Raikkonen mbajnë vendin e dytë dhe të tretë, me 57 e 43 pikë.
Gara e pestë sezonale do të zhvillohet pas dy javësh në Spanjë. /tesheshi.com/
