Amir Abrashi i cili ka nisur aventurën e tij të re në Bundesliga 2 me Fraiburg duket se është përshtatur mjaft mirë me ekipin e tij të ri dhe është gati të ndihmojë skuadrën të ngjitet sezonin e ardhshëm në elitën e futbollit gjerman.
Në katër ndeshjet e para miqësore me Fraiburgun, Abrashi ka shkëlqyer si mesfushor shkatrrues, por është paraqitur mjaft mirë edhe në fazën ofensive ku ka shënuar edhe dy gola. Në një prononcim për “Telegrafin”, djaloshi nga Gjakova flet për aventurën e tij të re duke treguar pse zgjodhi pikërisht Freiburgun, por edhe për ambiciet që ka me klubin gjerman.
“Kam zgjedhur Freiburgun sepse e kam ditur që është një klub që të jep mundësi për të ardhmen. Jam shumë i lumtur që ndodhem këtu pasi gjithçka po shkon siç është më së miri. Pritja që më është bërë nga bashkëlojtarët, stafi i trajnerëve, kryesia e klubit dhe tifozët ka qenë fantastike. Gjithçka është shumë mirë këtu dhe kjo është zgjidhja më e mira për mua.
Synimi kryesor i imi është që të arrij në Bundesligë me Freiburgun. Edhe klubi e ka këtë synim edhe pse do të jetë vështirë pasi në Bundesliga 2, pothuajse të gjitha skuadrat janë të fuqishme dhe kërkojnë një vend për në elitën e futbollit gjerman. Do të jetë vështirë por do t’ia dalim të futemi në Bundesligë”, tha Abrashi, i cili foli edhe për vendimin e KAS-it për dhënien e tri pikëve Kombëtares së Shqipërisë.
“Ka qenë vendim shumë i drejtë për të na dhënë tri pikë. Ne shkuam për të luajtur futboll sepse atë gjë dimë ta bëjmë më së miri dhe nuk shkuam për sherre. Vendimi i CAS-it ka qenë më se i merituar dhe këto tri pikë janë tejet domethënëse për ne. Jemi duke kaluar një moment të mirë me Kombëtaren e Shqipërisë dhe më e mira do të ishte sikur të merrnim pjesë në Kampionatin Evropian, për të realizuar ëndrrën e gjithë shqiptarëve. Katër ndeshjet e fundit janë si finale për ne dhe duhet t’i qasemi me seriozitetin më madh që të grumbullojmë sa më shumë pikë dhe të kualifikohemi për në kampionatin evropian ‘Francë 2016’”, përfundoi Abrashi. /tesheshi.com/
