Nga Mensur Krasniqi
Pas dështimit të Marrëveshjes së Përzhinos për zgjidhjen e krizës politike, Maqedonia po shkon drejtë izolimit ndërkombëtar. “SHBA-të dhe Bashkimi Evropian e kanë të qartë se angazhimet e tyre për implementimin e marrëveshjes së 2 qershorit kanë dështuar. Brenda dy ditëve përfaqësuesit ndërkombëtar do të dalin me qëndrim se Marrëveshja e Përzhinos ka dështuar, dhe për këtë fajtorë është kryeministri Nikolla Gruevski”, shkruan Libertas, duke iu referuar burimeve diplomatike.
Burimet thonë se ambasadorët e vendeve perëndimore në Shkup do të marrin instruksione nga qeveritë e tyre t`i ngrijnë të gjitha projektet dhe kontaktet me kryeministrinë dhe ministrat e qeverisë aktuale.
Sipas gjitha gjasave, BE do të marr masën e paraparë për t’i futur në listën e zezë të gjithë funksionarët e koalicionit qeverisës.
Me shumë vëmendje krizën politike në Maqedoni po e përcjellin edhe analistët. Sipas Albert Hanit, me mosrespektimin e Marrëveshjes së Përzhinos, liderët politikë së pari nuk e kanë respektuar veten, nuk e respektuan shtetin si dhe komunitetin ndërkombëtar. Ata edhe një herë zyrtarisht konfirmuan se nuk mendojnë gjë tjetër përpos interesave personale.
“Kësi lloj Maqedonie pa kredibilitet, pa autoritet dhe besueshmëri nuk duan as armiqtë më të mëdhenj të shtetit. Armiku i fortë do dhe homolog të denjë që di të luftoj përtej interesave personale. Problemi kryesor tani në këtë rast nuk është te ndëshkimi i Maqedonisë nga ndërkombëtarët për mosrespektimin e marrëveshjes së Përzhinos, problemi është se shkaku për dështimin është në fakt intenca e grupeve kriminogjene të infiltruar në sistemin politik, të ndikoj në prurje të një ligji me të cilin do të mund të fshihet i tërë kapitali i vjedhur nga populli i varfër”, deklaroi Alber Hani.
I pyetur nga portali tesheshi.com se çfarë do të ndodhë nëse futen në listën e zezë funksionarët e koalicionit qeverisës, Hani u përgjigj se këto grupe tashmë janë në listat e zeza te ndërkombëtarët por për fat të keq ende nuk janë në listat e zeza te ata që i votojnë që të vjedhin.
“Kështu nëse qytetarë duan ndryshime më mirë do të jetë që vetë ti bëjnë listat e tyre të zeza dhe të mos presin që ata listat tjera do të ndikojnë në jetën tonë. Ndërsa projektet i kemi që moti të ngrira, nuk ka më keq. Shteti jonë vjedh nga vetja dhe harxhon nga xhepi i shpuar për budallallëqe, nuk ka se ç’pret nga projektet e UE dhe botës, bota nuk është e çoroditur si shteti jonë. Ata nuk punojnë që politikanët tanë të pasurohen”, shtoi Hani.
Ndërsa profesori Mersel Bilalli ende shpreson se së shpejti do të kemi edhe një tentim të të jashtmëve që me presion akoma më të madh, ndoshta me përforcime shtesë, do ta deblokojnë gjendjen te bisedimet, përndryshe do të vijojnë protesta masovike për rrëzim të kësaj qeverie.
“Nëse ndërkombëtarët nuk arrijnë me kompromis të nxjerrin Maqedoninë nga kriza politike, atëherë do të kemi izolim të bartësve të funksionave të larta shtetërore dhe persona të përafërt me ta, si psh. ndalimi i udhëtimeve në shtete të caktuara, ndalimi i tranzitimit nëpër disa shtete dhe eventualish lista e zezë me logaritë e tyre bankare. Nëse edhe pas kësaj s’ka ndonjë përparim, atëherë do të aktivizohet rruga apo rrëzimi i qeverisë në Parlament (ku ekzistojnë votat e mjaftueshme), por vetëm nën dirigjimin e diplomacisë së padukshme. Kjo do të jetë e fundit, pasi lojtarët e jashtëm nuk duan ta faktorizojnë BDI-në e cila edhe vet është përgjegjëse për politikën antiamerikane, anti integrimeve dhe për krimin e organizuar. Më e preferueshme është detyrimi i qeverisë të dorëhiqet përmes protestave masovike”, deklaroi për tesheshi.com Mersel Bilalli.
Ndërsa organizata joqeveritare “CIVIL” vlerëson se duke i pasur parasysh problemet e deritanishme dhe opstrukcionet me të cilat po përballet implementimi i marrëveshjes për tejkalimin e krizës, bisedimet janë të pakuptimta.
“Opstrukcionet në bisedime janë të dukshme, që shihet në problemet rreth zgjedhjes së prokurores speciale, ndryshimit të rregullativës zgjedhore, reformat në KSHZ, mediat dhe shumë tema tjera. Marrëveshja po thyhet për çdo ditë dhe me një kampanjë agresive po keqpërdoret forca e veprimeve korruptive të pushtetit. Bisedimet nuk dukeshin në asgjë edhe deri më tani. Nuk ndihmuan as diplomatët e huaj të cilët ditë e natë përmendin fatin e procesit, nuk ndihmuan as ekspertizat dhe kërkesat e shoqërisë civile.”, thuhet ndërmjet tjerash në njoftimin e CIVIL.
Pra mbetet të shohim nëse funksionarët qeveritarë do të futen në listë të zezë dhe, e gjithë kjo do paraqiste një inkurajim të tërë opinionit publik për protesta, pra do të krijohej masë më e madhe kritike për rëzim të qeverisë. /tesheshi.com/
