Burime ushtarake ukrainase deklarojnë se Federata Ruse ka marrë vendimin për të sulmuar Moldavinë me justifikimin e mbrojtjes së popullsisë ruse në rajonin separatist të Transnistrisë.
Ata pretendojnë se informacione të shumta nga burime të inteligjencës sugjerojnë se Rusia shumë shpejt mund të fillojë aktivitetet për ribashkimin e pjesëve të Ukrainës jugore nën kontrollin e Rusisë dhe rajonit Transnistrian në Moldavi.
Aktivitete të intensifikuara po vihen re në aeroportin e Tiraspolit, kryeqyteti i parashtetit të panjohur moldav të Transnistrisë. Ukrainasit presin që rusët të transferojnë një pjesë të trupave të tyre me avionë dhe helikopterë që do të niseshin nga Krimea, dhe në të njëjtën kohë, në kryeqytetin e Moldavisë, Kishinau, do të organizonin protesta dhe trazira.
Tensionet tashmë po rriten në Transnistria pas një sërë shpërthimesh misterioze për të cilat fajësohen “terroristët”.
Analistët perëndimorë besojnë se qëllimi i Kremlinit mund të jetë krijimi i një ure tokësore nga Rusia përgjatë bregut të Ukrainës në Transnistria, duke shkëputur Ukrainën nga Deti i Zi.
Moldavia është një nga vendet më të varfra të Evropës, duke luftuar me një fluks të madh refugjatësh dhe pasojat ekonomike të luftës që kanë ndalur shumë nga eksportet e saj. Ajo nuk është anëtare e NATO-s dhe kufizohet me Rumaninë.
Gazeta britanike The Times, e cila analizoi në detaje mundësitë e sulmit rus ndaj Moldavisë, vëren megjithatë se shumica e informacioneve të inteligjencës sugjerojnë se Rusia nuk është e aftë për këtë sulm për momentin.
Ata besojnë se nuk janë në gjendje të ofrojnë një rrugë adekuate për avionët e tyre pa rrezikuar të rrëzohen nga mbrojtja ajrore pranë Odessa-s. Besohet se rreth 1500 ushtarë rusë janë tashmë në Transnistria dhe të gjitha trupat e reja që do të fluturojnë në aeroport do të duhet të kalojnë hapësirën ajrore të Ukrainës, gjë që është një rrezik i madh.
Për të transferuar municione dhe trupa, Rusia do të duhet të ndërtojë një korridor tokësor nga Khersoni përmes një pjese të Mykolayiv-it dhe Odessa-s.
Atje do të përballeshin me rezistencë të ashpër nga forcat ukrainase – analizon The Times dhe spekulon se Rusia mund të përpiqet të sulmojë Moldavinë rreth datës 9 maj.
Në këtë datë, Putin mund të shpallë njohjen e pavarësisë së Transnistrisë, duke çuar në një skenar të ngjashëm me Donbasin dhe një kërcënim të drejtpërdrejtë për integritetin territorial të Moldavisë.
Sipas analistëve ushtarakë britanikë, një operacion ushtarak nga forcat ruse mund t’i shërbejë Rusisë për tre qëllime.
Një raport nga Jack Watling dhe Nick Reynolds i Institutit Mbretëror të Shërbimeve të Bashkuara sugjeron se Shërbimi Federal i Sigurisë (FSB), agjencia kryesore e spiunazhit të Rusisë, po diskuton një përpjekje për të destabilizuar Moldavinë për të lidhur forcat ukrainase në kufirin jugor.
Qëllimi i dytë është të kundërshtojë disponimin në rritje pro-evropian në vend dhe i treti – t’i tregojë Perëndimit se mbështetja e Ukrainës rrezikon pasoja më të gjera, përfshirë ato në Ballkan. /tesheshi.com/
