Nga Blendi Gashi
Partitë opozitare me ngulm po kërkojnë nga kryeministri Isa Mustafa të tërheqë nënshkrimin nga marrëveshjet e arritura me Serbinë në Bruksel. Në të kundërtën ‘Vetëvendosje’, AAK, dhe Nisma për Kosovën, kanë bërë të qartë se do të vazhdojnë bllokimin e Kuvendit të Kosovës.
Të gatshëm janë edhe për protesta dhe masa të tjera, në kauzën kundër ‘Zajednicës’ dhe Demarkacionit me Malin e Zi. Opozita nuk e përjashton edhe shkuarjen në zgjedhje duke thënë se janë të gatshëm edhe për një gjë të tillë.
Pavarësisht kërkesës së opozitës për zhvleftësimin e marrëveshjeve të nënshkruar në Bruksel, kryeministri Mustafa ka thënë se një gjë e tillë nuk do të ndodhë dhe nuk mund të bëhet, pasi, siç thotë ai, është marrëveshje ndërkombëtare.
Por, sa është reale kërkesa e opozitës për të tërhequr nënshkrimin nga një marrëveshje ndërkombëtare, apo thjesht po përdoret si kartë nga opozitarët për të shkuar në zgjedhje…?
Ekspertë ligjorë dhe analistë e shohin të parealizueshme kërkesën e opozitës për tërheqjen e nënshkrimit. Ata thonë se një gjë e tillë nuk mund të ndodhë, pasi garant i marrëveshjes Kosovë-Serbi, është Brukseli zyrtar dhe përshëndetur njëkohësisht nga Shtetet e Bashkuara të Amerikës.
Riza Smaka, njohës i çështjeve kushtetuese në vend ka deklaruar për portalin “Te Sheshi”, se në parim dhe për hir të proveniencës ndërkombëtare, marrëveshja e ratifikuar nuk preferohet të mohohet në formën juridike.
Mirëpo, ai shprehet, e në rastin tonë referuar marrëveshjeve për Asociacionin dhe Demarkacionin me Malin e Zi, se situata juridike madje edhe politike është ndryshe, pasi me tekstet e këtyre marrëveshjeve nuk janë informuar as deputetët e Kuvendit e jo më opinion i gjerë.
“Ato marrëveshje edhe sipas nenit 18 të Kushtetutës duhet të ratifikoheshin para hyrjes në fuqi, pra nuk mund të jenë valide e aplikative; aq më pak kur mbi 150 mijë qytetarë dhe e tërë opozita parlamentare ka objeksione serioze kundër atyre marrëveshjeve. Qeveria gabimisht dhe në mënyrë cinike tenton të justifikohet,ndër të tjera me marrëveshjen e parë të vitit 2013, ngase kjo e tanishmja e tejkalon atë kualitativisht e kuantitativisht, pra si e tillë është marrëveshje e re, e veçantë. Aq më parë kur me marrëveshjen për Asociacionin e Komunave me shumicë serbe nuk janë përfille jo pak dispozita kushtetuese!”, thekson Smaka.
Analisti politik, Albinot Maloku, kërkesën e opozitës për tërheqjen e nënshkrimit ne quan kërkesë joserioze dhe të parealizueshme, pasi ka mbështetje ndërkombëtare.
“Është e parealizueshme ngase për marrëveshjet e inicializuara në Bruksel nga ana e krerëve të qeverive shtetërore të Kosovës dhe Serbisë është garant edhe Brukseli zyrtar, ndërkohë që është përshëndetur edhe nga Shtëpia e Bardhë, konkretisht Presidenti Obama. Veç kësaj, ku fuqitë ndërkombëtare e njëkohësisht mbështetëse të shtetit të Kosovës janë pro këtyre llojeve të marrëveshjeve. Kosova pretendon të ketë seriozitet për nënshkrimet e saja dhe me tërheqje do të bije serioziteti. Do të mund ta tërhiqte nënshkrimin nëse pala tjetër nuk e respekton marrëveshjen. Si e tillë, marrëveshja e Brukselit për themelimin e Asociacionit të Komunave me shumicë serbe në Kosovë, por edhe ajo për demarkacionin e kufirit me Malin e Zi janë shumë të dëmshme, dhe për këtë fajtor është Qeveria Thaçi dhe vazhdimi i saj, Qeveria Mustafa”, ka deklaruar Maloku për “Te Sheshi”.
Opozita është këmbëngulëse që nuk do të lejojë funksionimin e Kuvendit të Kosovës, nëse kryeministri nuk e tërheq nënshkrimin.
Ndërkaq, kryeministri Mustafa tha se opozita duhet të tërhiqet nga këto veprime dhe e ka ftuar për debat në Kuvend. I pari i Ekzekutivit ka thënë se marrëveshjet e nënshkruar në Bruksel janë sipas ligjeve dhe kushtetutës së Kosovës, duke thënë se është i gatshëm që të raportojë në çdo kohë për firmat e hedhura.
Ndryshe, Zyra e Presidentes së Kosovës u ka bërë thirrje partive të flasin mes vete, dhe në asnjë mënyrë të mos bllokojnë punën e institucioneve. /tesheshi.com/
