Jeni artist? Ndoshta ju pëlqen t’i kaloni fundjavat duke ushtruar ndonjë zeje, apo thjesht duke kaluar kohë me miqtë. Atëherë kemi një lajm të mirë për ju: Vazhdoni me ato aktivitete dhe jo vetëm për argëtim. Ato ju bëjnë mirë për shëndetin gjithashtu.
Sipas një studimi të ri në neurologji marrja me pasione kreative dhe aktivitete të parapëlqyera në moshë të shtyrë mund të ta ruajë mendjen dhe ta mënjanojë sëmundjen e dementias (çmendurinë).
Hulumtuesit kanë zbuluar se personat e moshës së mesme, por edhe ata të moshës së madhe që merren me aktivitete artistike, siç është piktura, vizatimi, dhe skulptura kanë 73% më pak gjasa të kenë probleme me kujtesën dhe të menduarit, siç është dëmtimi i lehtë konjitiv që çon deri te sëmundja e dementias. Ky studim gjithashtu tregon se personat e moshës së mesme, por edhe ata të moshës së madhe që merren me hobi të ndryshme, siç është qepja, zdrukthëtaria, dhe poçaria kanë 45% më pak gjasa të hasin në probleme kognitive.
Ja si duket truri juaj kur merreni me aktivitete krijuese
Shoqërimi me të tjerët, apo shkuarja kinema, koncerte, klube leximi, dhe udhëtimi kanë bërë që pjesëmarrësit e studimit të kenë 55% më pak gjasa të preken nga sindroma e dëmtimit të lehtë konjitiv.
Gjithashtu edhe përdorimi i kompjuterit në moshë të shtyrë ka bërë që të ulet rreziku për 53%. Instituti Kombëtar për Plakjen i Klinikës Mayo është marrë me këtë studim për katër vjet radhazi dhe është përqendruar në 256 pacient mosha mesatare e të cilëve ishte 87 vjeç. Te këta pacientë në veçanti, si pjesë e një grupi më të madh, nuk janë shfaqur probleme konjitive gjatë këtij studimi.
“Zgjidhja tek e cila kemi arritur përmes këtij studimi është parandalimi”
Sipas këtij studimi, grupmosha që më së shumti është duke u rritur në SHBA përfshin personat 85 vjet e lart. Humbja e kujtesës është goxha e përhapur te personat nga 90 vjeç e lart dhe disa prej këtyre problemeve të kujtesës mund të çojnë deri te sëmundja e dementias.
“Zgjidhja tek e cila kemi arritur përmes këtij studimi është parandalimi. Të gjithë janë të prekur nga Alzheimeri dhe dementia. Mirëpo, vetë fakti që tani e dimë se kemi mundësi të bëjmë diçka lidhur me këtë është arritje e madhe. Tani mund t’i ndihmojmë vetes,” ka thënë studiuesja Roberts.
Sipas saj, rezultatet e nxjerra nga ky studim nuk vlejnë vetëm për ata që janë duke u futur në moshë të mesme apo në moshë të shtyrë. Njerëzit që merren me ndonjë pasion, hobi, apo janë aktivë në shoqëri në moshë të re, duhet të orvaten të jenë të tillë gjatë tërë jetës.
Sado e përsosur që duket një gjë e tillë, Roberts ka pohuar se shumë njerëz i lënë pas dore këto aktivitete pas shkollës së mesme apo fakultetit dhe i përkushtohen karrierës./tesheshi.com/
