Për opozitën, reforma territoriale e promovuar e zbatuar më pas me bujë nga mazhoranca, mund të konsiderohet e dështuar. Deputetja Jorida Tabaku ofroi një shifër financiare në mbrojtje të këtij qëndrimi:
“Reforma territoriale ka dështuar bashkë me premtimin kryesor për kursimin e 80 milionë eurove dhe propagandimin për të bërë më shumë punë me më pak lekë. Vetëm për paga bashkitë paguajnë 116 milionë euro në vit, gati dy herë më shumë se në 2014. Nuk u shoqërua me buxhete të përshtatshme, zgjerim kompetencash. 3 vjet më pas reforma territoriale është rrëzuar”, tha ajo në takimin e Komitetit Europian të Rajoneve për çështjen e reformës territoriale.
Sipas saj, ajo reformë ishte thjesht krijimi i një harte të re elektorale për të përfituar sa më shumë vota.
Kujtojmë se opozita e bojkotoi të gjithë debatin për reformën territoriale. Në emër të një konsensusi mazhorancë – opozitë, ajo kaloi në parlament me votat e PDIU-së, që më pas vendosi kalimin nga opozita në koalicion me pushtetin. /tesheshi.com/
