Komandanti i Marinës Ruse, Admirali Nikolai Yevmenov, u takua me anëtarët e ekuipazhit të kryqëzorit të mbytur “Moskva” dhe tha se ata do të vazhdojnë të shërbejnë në anijet e tjera luftarake ruse, njoftoi agjencia ruse e lajmeve Tass.
Rusia njoftoi të enjten mbrëma se anija kryesore e Flotës ruse të Detit të Zi ishte fundosur pas një shpërthimi të municioneve të saj. Ukraina njoftoi se anija u godit nga raketat e saj Neptun, fakt që u konfirmua dje nga një zyrtar i lartë i Pentagonit amerikan.
Kremlini nuk ka dhënë asnjë informacion mbi viktimat midis 510 anëtarëve të ekuipazhit të Moskva.
Ministria ruse e Mbrojtjes pretendoi se ekuipazhi u hoq nga kryqëzori rus. Burimet ukrainase, megjithatë, thanë se operacionet e evakuimit të anijes kishin dështuar për shkak të kushteve të motit.
Ministria ruse e Mbrojtjes ka publikuar një video prej disa sekondash që tregon admiralin Nikolai Gevlenov dhe dy oficerë të tjerë duke inspektuar rreth 100 marinarë të rreshtuar. Ministria e Mbrojtjes nuk specifikon se kur është zhvilluar takimi.
https://youtu.be/wSVxY3WK170
Dje, një zyrtar ushtarak ukrainas tha se ekuipazhi i flotës ruse të Detit të Zi “Moskva”, i cili u mbyt të enjten në Detin e Zi, nuk mund të shpëtohej.
“Ne shikuam varkat që përpiqeshin të vinin në shpëtim, por edhe forcat e natyrës ishin në anën ukrainase”, sepse “një stuhi pengoi që anija të shpëtohej dhe ekuipazhi të evakuohej”, tha ai. Ai shtoi, megjithatë, se nuk mund të jepte detaje për fatin e ekuipazhit, për mungesë të “të dhënave të besueshme”.
Ministria ruse e Mbrojtjes tha të premten se ekuipazhi – të paktën 500 persona – “u largua për në anije të tjera të Flotës së Detit të Zi aty pranë”. Megjithatë, ajo nuk specifikoi nëse ishte i gjithë ekuipazhi dhe as nuk dha ndonjë detaj. /tesheshi.com/
