Nga Blendi Gashi
Mjaftuan dy orë të qëndrimit në aeroport të sekretarit amerikan, John Kerry, që t’i ndërrojë qasja si kryeminstrit Isa Mustafa dhe si zv. të tij Hashim Thaçi.
Të dy këta liderë, në mënyrën më të ngrohtë të mundshme i bën ftesë të hapur opozitës së bashkuar që të ulen në një tryezë për të biseduar dhe tejkaluar krizën politike që ka kapluar vendin.
Por, nuk vonoi shumë dhe vetëm pas pak orësh opozita iu kundërpërgjigj pushtetit negativisht duke thënë se nuk pranojnë të bisedojnë pa u anuluar dy marrëveshjet, ajo për Asociacionin dhe Demarkacionin me Malin e Zi.
Refuzimi i opozitës e bën edhe më të paqartë rrugëzgjidhjen dhe kthimin e normalitetit në Kuvend.
Kryeministri Isa Mustafa pas refuzimit të ftesës nga opozita ka thënë se kjo çështje nuk është e mbyllur dhe ende ekziston mundësia të bisedojnë dhe të bëjnë zgjidhje.
“Unë kam dhënë iniciativën time në mënyrë që të kalohet kjo situatë dhe unë mendoj se kjo çështje nuk është e mbyllur dhe ekziston mundësia të ulemi të bëjmë zgjidhje”, ka deklaruar Mustafa.
Por, si e shohin analistët refuzimin e opozitës dhe a ka ende hapësirë për dialog mes pushtetit dhe opozitës?
Njohësi i rrethanave politike në vend, Nexhmendin Spahiu ka deklaruar për tesheshi.com se ftesën e pushtetit për dialog e quan joserioze, pasi thotë se është bërë pa ndërmarrë ndonjë hap konrekt, dhe vetëm pas presionit të vizitës së sekretarit Kerry i cili ia ka “ngrehur” veshët kryeministrit Mustafa.
“Kjo ftesë është joserioze. Nuk mund ta thërrasësh tjetrin në dialog për një çështje për të cilën i ke burgosur aktivistët e opozitës. Kthimi i parë nga dialogu do të ishte lirimi i të burgosurve dhe shkarkimi i menjëhershëm i Komisionit për Demarkacionin me Malin e Zi, që e ka shkaktuar gjithë këtë situatë. Kjo është rrugë e konfrontimit dhe nëse vazhdohet kështu dërgohet vendi në luftë civile.
Qeveria duhej të bënte hapa konkretë për të treguar prirje para se ta bënte ftesën për dialog”, shprehet Spahiu.
Nga ana tjetër, analisti Blerim Burjani, në një prononcim për tesheshi.com thotë se dëshirë e opozitës është që të komplikojë situatën, të thellojë krizën, dhe pamundësojë dialogun.
Ai thotë se si pozita ashtu edhe opozita janë të papërgjegjshëm para qytetarëve, të painteresuar për të gjetur zgjidhje dhe të paarsyeshëm.
“Ideja është që kjo opozitë ta lë përgjegjëse në secilin variant qeverinë, kjo tash është e kuptueshme nga qytetarët. Ideja e gazit lotsjellës, protestat, nxitjet ndaj këtij koalicioni për të marrë masa është koncept amator politik. Nxitësi i situatës mban përgjegjësi sa edhe bërësi, andaj kjo strategji është e qartë për secilin njeri”, thotë Burjani.
Ndryshe, derisa pushteti ka zbutur qëndrimet dhe fton për debat opozitën, kjo e fundit ka nisur organizimin e manifestimeve, ku të parin e mbajti në qytetin e Gjakovës nga i çuan mesazh edhe një herë pushtetit se marrëveshjet nuk kalojnë, ndërkohë që kërkesave iu shtua dhe ajo për lirimin e deputetëve të burgosur. /tesheshi.com/
