Vatikani njoftoi të hënën se priftërinjtë dhe zyrtarë të tjerë të Kishës Katolike nuk mund të bekojnë bashkime të të njëjtit seks dhe se bekime të tilla “nuk janë të ligjshme” nëse zbatohen.
Zyra Doktrinore e Vatikanit, Kongregata për Doktrinën e Besimit (CDF), e mori vendimin në përgjigje të pyetjeve dhe lëvizjeve në disa famulli për të siguruar bekime të tilla si një mirëseardhje për katolikët homoseksualë, duke qenë se Kisha nuk lejon martesa homoseksuale.
Papa Françesku miratoi përgjigjen, tha CDF, duke shtuar se “nuk ka për qëllim të jetë një formë e diskriminimit të padrejtë, por një kujtesë e së vërtetës së ritit liturgjik”.
Thuhet se bekime të tilla nuk lejohen edhe pse ato “motivohen nga një dëshirë e sinqertë për të mirëpritur homoseksualët” dhe për t’i ndihmuar ata të rriten në besim.
Vendimi i CDF thotë se, meqë martesa midis një burri dhe një gruaje është një sakrament dhe bekimet lidhen me sakramentin e martesës, ato nuk mund të shtrihen në çiftet e të njëjtit seks.
“Për këtë arsye, nuk është e lejueshme të bekosh një marrëdhënie ose partneritet, qoftë edhe të qëndrueshëm, që përfshin aktivitete seksuale jashtë martese (d.m.th., jashtë bashkimit të pazgjidhshëm të burrit dhe gruas), siç është rasti me bashkimin e të njëjtit seks”, thuhet më tej. /tesheshi.com/
