90-vjetori i Medresesë- Rama kërkon shpëtimin e shoqërisë me anë të fesë

Në një ceremoni më rastin e 90-vjetorit të cceljes së Medresesë së  Tiranës, kreu i qeverisë së Tiranës Edi Rama, i ka mëshuar fort në fjalën e tij rëndësisë dhe emergjëncës që ka për shoqërinë edukimi fetar dhe të jetuarit me frymën e besimit.

“Medresetë lipset të konfirmohen në frymën e shekullit në të cilin jetojmë. Në kundërshtim me ç’u mendua nga filozofë entuziastë, edhe pse shpesh herë shumë të kthjellët, sot nuk duket se ideja e Hyjit të ketë vdekur, as që fetë të jenë duke shkuar drejt fundit. Përkundrazi, ato madje u rikthyen fuqishëm edhe në një vend si Shqipëria, e cila nekrologjinë e Zotit e shpalli edhe në Kushtetutë për disa dekada.

Emergjenca e kohës nuk është pra shpëtimi i fesë, apo “nderit të Zotit”, siç shprehen disa fanatikë dritëshkurtër. Aktualiteti dëshmon në të kundërt se si emergjencë, për të gjithë, shfaqet nevoja e shpëtimit të civilizimit, e shpëtimit të kulturës, e shpëtimi të qytetarisë. E pa asnjë dyshim, brenda kësaj nevoje për shpëtim, feja është ithtar i pazëvendësueshëm”, tha Rama. Dhe një nga mënyrat për të përmbushur këtë mision është krijimi i qytetarëve të mirë dhe të përgjegjshëm.

“Ky mision, që e tashmja e ngatërruar ja vë barrë mbarë Islamit të ndriçuar dhe myslimanëve të ndritur e të ditur, është edhe më tepër misioni historik dhe lavdia e përveçme për të cilën kjo medrese dhe medresetë e tjera të Shqipërisë duhet të aspirojnë me përdëllim dhe me zjarrin e zemrës”, tha kryeministri, që ka “paralajmëruar” se shekulli XXI e ka fenë si karkateristikë dominuese dhe të pazgjidhshme.

“Shkrimtari i madh agnostik francez, André Malraux na ka lënë trashëgim një profeci, e cila, në kontekstin aktual, shfaqet e mbarsur edhe me një dozë ankthi: “Shekulli XXI-të, do të jetë fetar ose nuk do të jetë”. Prandaj stërmundohemi…që mbi profecitë të ndërtojmë një shekull qytetarie dhe urtësie. Kjo është sfida…”,

Ishin këto disa prej frazave më të zgjedhura nga fjalimi i kryeministri Rama. /tesheshi.com/