Nëntë vjet më parë, dy muaj pas shpalljes së Pavarësisë së Kosovës është ratifikuar Kushtetuta në Kuvend e cila ka hyrë në fuqi më 15 qershor të vitit 2008.
Pas kësaj kohe politika kosovare ka mendime të ndryshme sa i përket respektimit të saj.
Presidenti Hashim Thaçi, në këtë jubile tha se është qenësore që të gjithë të jemi zbatues të saj.
“Institucionet Kosovës dhe qytetarët kanë punuar që Kosova të jetë vendi i të gjithëve. Jemi faktor stabiliteti në rajon. Shteti i Kosovës është ndërtuar mbi parime kushtetuese gjithëpërfshirëse. Republika e Kosovës ka krijuar mekanizmat e vetë për mbrojtjen e qytetarëve, promovimin dhe zhvillimin e prosperiteti social për të gjithë qytetarët e saj. Zbatimi kushtetues është qenësor për vendin tonë”, u shpreh ai.
Kurse kryekuvendari Kadri Veseli pohoi se Kushtetuta është identiteti i shtetit tonë të pavarur dhe sovran dhe se historia e Kushtetutës është e gjatë dhe e dhimbshme që ndërlidhet edhe me të kaluarën.
“Prilli 2008 kjo ëndërr u bë realitet, u krijua Kushtetuta për të zbatuar deklaratën e Pavarësisë dhe vullnetin e popullit”, tha Veseli.
Sipas tij, Kushtetuta përmban standardet më të larta të lirive dhe të drejtave të njeriut, por që ende ka sfida që këto të drejta të respektohen plotësisht.
Por këto fjalime të pushtetarëve e kanë nervozuar jo pak deputeten opozitare Albulena Haxhiu.
Ajo përmes një shkrimi në Facebook thotë se të njëjtit pa fije turpi po flasin për Kushtetutën, e s’kanë lënë shkronjë të kësaj Kushtetute pa shkelur.
“Fakti që në krye kemi një kryeminister si Isa Mustafa, që ka shkelur 23 nene të Kushtetutës me marrëveshjen për ‘Zajednicen’ (dhe ende nuk është dorëhequr), tregon se për çfarë ‘kushtetutshmërie’, ‘demokracie’ e ‘pavarësie’ po flasin! Hipokritët!”, thotë ajo. /tesheshi.com/
