Parlamenti shqiptar zhvilloi sot një seancë të veccantë plenare me rastin e 70 vjetorit të ekzekutimit të grupit të deputetëve nga regjimi komunist.
I pranishëm në seancë, kryeministri Edi Rama u shpreh se është koha për të hedhur dritë mbi të kaluarën, për të mbrojtur të ardhmen nga errësirat e të shkuarës.
Rama e quajti ligjin për hapjen e dosjeve si një hap përpara për Shqipërinë, e cila do të rradhitet përkrah vendeve që e kanë lënë të kaluarën pas.
“Ligji për hapjen e dosjeve, pas 25 vjetësh e bashkoi Shqipërinë me vendet që kaluan ferrin komunist dhe që vendosën të ndahen me të jo thjesht duke ndërruar sistemin dhe kostumet, por duke guxuar të bëjnë dritë mbi të shkuarën.
Ligji i sotëm na krijon mundësinë për mjete hulumtimi në funksion të një misioni human. Unë jam krenar që jam në krye të një qeverie e shumice që këtë mision e mori përsipër pasi të tjerë para nesh nuk patën kurajon apo nuk gjetën kohën që ta merrnin
Do të jetë një rrugë e dhimbshme, për të mos lejuar që e kaluara të mbajë peng të ardhmen tonë”, u shpreh Rama.
Në vijim, kryeministri u shpreh se ata që dhanë jetën 70 vjet më parë, bënë një sfidë ndaj një regjimi që fatkeqësisht e pati jetën shumë të gjatë pas marrjes së jetës së tyre dhe që fatmirësisht u përmbys 25 vjet më parë.
Rama tha se ndoshta nuk do të arrijmë ta pastrojmë këtë sallë apo politikën nga ndotja e atij mekanizmi që helmon apo të asaj të shkuare që shkoi për skrap 25 vjet më parë, por mund të hedhim pak dizinfektant në këtë sallë dhe në të ardhmen muret e saj, të mos jenë dëshmitarë të aq shumë gjërave të padenja që kanë përjetuar në këto 27 vjet.
Kreu i qeverisë u shpreh se, një major dhe dy kapitenë u deshën që të shfarosej 25 % e parlamentit të kohës.
“Dosja penale, apo më saktë sajesa e kobshme që u mbyll në shtator 1947, provat e së cilës janë sot të lexueshme duhet sikur vijnë nga një e shkuar, e cila tenton ta mbajë peng të ardhmen tonë përmes fantazmash, figurash që kanë ditur ta përdorin demokracinë”, tha Rama. /tesheshi.com/
