Në një aktivitet kushtuar 7-vjetorit të anëtarësimit në NATO, nuk dihet se pse ishte zgjedhur pikërisht kryebashkiaku i Tiranës, Erion Veliaj, për ta hapur pikërisht ai këtë aktivitet me një fjalim kortezial.
Veliaj, edhe për shkak të detyrave që ka ushtruar, apo asaj që ushtron si kreu i bashkisë së kryeqytetit, nuk ka asnjë lidhje me procesin e anëtarësimit të Shëipërisë në NATO. Vitin e anëtarësimit ai ishte ende pjesë e shoqërisë civile, ndërsa nuk ka patur dhe ndonjë karrierë ushtarake në jetën e tij, apo diçka që ta lidh me ushtrinë, e posaçërisht me NATO-n.
Ai e cilësoi si “ngjarje të madhe” dhe më pas tentoi të përligjte praninë e tij aty me një fjalim, duke thënë: “Kemi vendosur hapjen e një muzeu me tunelet nëntokësore që ka sot në nën-dheun e Tiranës, muze i cili do të nis tek bunkeri i ngritur në krah të Ministrisë së Brendshme, për të kujtuar se si Shqipëria kaloi nga një vend anti-NATO, në një vend anëtar të NATO-s dhe dëshirën e plotë për integrimin e plotë në Bashkimin Europian”.
Tjetër e metë e ceremonisë në fjalë, ishte mospërmendja në asnjë rast e faktit se anëtarësimi në NATO ndodhi gjatë qeverisjes “Berisha”, edhe pse ky i fundit, në atë kohë e privatizoi si arritje të tijën, pa e përmendur faktin se në proçesin e afrimit e më pas anëtarësimit në NATO, kishte një rol dhe qeverisja socialiste, paraardhëse e qeverisjes së tij.
Madje u përfol se Berisha po tregohej mosmirënjohës, pasi “pazari politik” mes tij dhe Ramës i tyre kishte qenë mosreagimi i fortë opozitar ndaj tragjedisë së Gërdecit, për hir të futjes së vendit në Aleancën Atlantike.
Ja si u shpreh ministrja Kodheli: “Në vitin 2009, Shqipëria u anëtarësua në Organizatën e Traktatit të Atlantikut të Veriut NATO, pas përfundimit të ratifikimit të Protokollit të Anëtarësimit nga të gjitha vendet aleate dhe depozitimit të instrumentit të aderimit në NATO në Departamentin e Shtetit që është edhe mbajtësi ligjor i Traktatit të Uashingtonit”…
….“Shqipëria gjeneron paqe, siguri dhe stabilitet”, theksoi ajo. Duke u ndalur në paqen në rajon, Kodheli theksoi se, në këtë drejtim “Shqipëria ka marrë një rol primar me donacionet ushtarake. Qeveria ka bërë shumë reformë për modernizimin e FA-ve. Falënderoj për këtë rrugëtim, qeveritë e SHBA-ve, Turqisë, Greqisë, Italisë, Gjermanisë e Britanisë. Falenderim për të gjitha ata që e kanë bërë të mundur anëtarësimin në NATO. Falenderoj Forcat e Armatosura, faktorin politik, administratën shqiptare dhe shoqërinë”….
Pra, asnjë përmendje e emrit të Berishës. Ngjashëm dhe në fjalimin e ministrit të Jashtëm, Bushati.
Përgatiti: Ermir Hoxha – /tesheshi.com/
