Shumë njerëz nuk dinë të kujdesen mirë për trupin e tyre. Ju mund të mos e dini, por ato shqetësime të vogla shëndetësore që i ndieni shpeshherë, si ftohjet e pafundme, kualiteti i dobët i gjumit, lodhja e shpeshtë dhe dhimbjet e vazhdueshme, mund të jenë pikërisht për shkak të shprehive të këqija jetësore.
Nëse nuk i merrni parasysh gjërat që bëni dhe ushqimet që hani, rrezikoni të dëmtoni sistemin tuaj imunitar. Sistemi juaj imunitar është linja kryesore e mbrojtjes së trupit tuaj kundër trupave të huaj që shkaktojnë sëmundje.
Me një sistem imunitar të dobësuar, ju jeni të prirur për t’u sëmurë, duke çuar përfundimisht drejt një mirëqenie të përgjithshme të dobësuar. Për të parandaluar shfaqjen e sëmundjeve, ju prezantojmë shtatë zakone të këqija që mund të jeni duke i bërë, e të cilat janë duke dëmtuar sistemin tuaj imunitar:
1.Pirja e duhanit
Ju e dini tashmë se pirja e duhanit, madje edhe thithja pasive e tymit të duhanit, mund të çojë deri te gjendjet shumë të rrezikshme shëndetësore, duke filluar nga sistemi imunitar i dobësuar. Përfundimisht, nëse shprehia e pirjes së duhanit nuk ndërprehet, kjo mund të çojë në disa lloje të kancerit, përfshirë kancerin e mushkërive dhe të gojës. Fundja, nga 4,000 komponimet kimike në një tym të cigareve, të paktën 43 janë kancerogjene ose janë në gjendje të shkaktojnë kancerin.
2.Konsumimi i tepërt i alkoolit
Konsumi i tepërt i alkoolit është shumë i dëmshëm për sistemin tuaj imunitar, pasi që alkooli mund të shkatërrojë protagonistët kryesorë të sistemit imunitar, e që janë antitrupat. Antitrupat janë qelizat që luftojnë kundër trupave të huaj, siç janë bakteret dhe viruset që kanë gjetur rrugën deri në trupin tuaj duke shkaktuar kështu sëmundje të ndryshme. Nëse konsumoni shumë alkool, sistemi imunitar do të dobësohet ndjeshëm për shkak të zvogëlimit të numrit të antitrupave dhe ju do keni më shumë gjasa për t’u prekur nga ndonjë sëmundje.
3.Gjumi i pakët
Kur fle, trupi juaj riparon vetën dhe rifreskon funksionet e sistemit trupor. Nëse nuk bëni gjumë të mjaftueshëm, sistemi juaj imunitar nuk do të jetë në gjendje që të rivendoset plotësisht vetë, dhe në mënyrë që t’i bëjë ballë ekspozimit ndaj faktorëve të jashtëm ditën e nesërme. Kjo do të dobësojë sistemin tuaj imunitar dhe do të vë në rrezik organizmin nga infektimi bakterial dhe viral. Prandaj, mungesa e gjumit çon në rrjedhje të hundëve të nesërmën, ngase shumë lehtë mund të ndodhë që të jeni prekur nga virusi i ftohjes së zakonshme.
4.Të qenurit nën stres për një kohë të gjatë
Të qenurit i stresuar për një kohë të gjatë mund të ndikojë negativisht në sistemin tuaj imunitar dhe t’ju bëjë më të prirur ndaj sëmundjeve. Kur niveli juaj i stresit është i lartë, truri juaj prodhon sasi më të mëdha të hormonit të kortizolit, i cili dobëson ose plotësisht dëmton funksionimin e qelizave T. Qelizat T janë të nevojshme për luftimin e infeksionit. Andaj, gjeni ndonjë hobi dhe aktivitet i cili do t’ju ndihmojë në lehtësimin e stresit tuaj.
5.Vetmia
Vetmia nganjëherë mund të shkaktojë varësi. Njerëzit që janë të vetmuar, janë të prirur të kënaqen në të dhe nuk arrijnë të kënaqin nevojën e tyre për shoqërim. Nëse nuk ndërmerrni veprime të domosdoshme për marrëdhënie sociale për shkak se jeni shumë të zënë, sistemi juaj imunitar do të shtypet. Gjithashtu, do të formohen radikalë të lirë në trupin tuaj, duke shkaktuar më shumë dëme në qelizat tuaja nga stresi oksidativ. Kjo ju bën më të prirur ndaj sëmundjeve dhe përshpejton plakjen e qelizave tuaja
6.Mungesa e ushtrimeve
Ushtrimi është një nga mënyrat më të mira për t’u kujdesur për trupin tuaj. Në të kundërtën, mungesa e ushtrimeve do të dëmtojë sistemin tuaj imunitar dhe të zvogëlojë mirëqenien tuaj të përgjithshme edhe në qoftë se ju nuk e vërerni atë. Njerëzit që nuk ushtrojnë kanë më shumë gjasa që të sëmuren dhe ata janë në rrezik më të lartë nga sëmundje të tilla si diabeti dhe sëmundjet kardiovaskulare. Megjithatë, teprimi me ushtrime gjithashtu mund të shtyp sistemin tuaj imunitar. Andaj, kur të filloni me ushtrimet, bëni ushtrime të moderuara në vend të atyre intensive.
7.Konsumimi i sasive të mëdha të sheqerit
Sheqeri zvogëlon aftësinë e sistemit tuaj imunitar për të luftuar mikrobet dhe zëvendëson vitaminën C që rrit sistemin imunitar në trupin tuaj. Në vetëm pak minuta pas konsumit, sheqeri zvogëlon funksionimin e sistemit tuaj imunitar për rreth 40%. Mundohuni të pakësoni marrjen tuaj të sheqerit dhe të rrisni marrjen e vitaminës C në mënyrë që të siguroni një sistem imun të shëndetshëm./tesheshi.com/
