Kur duam të blejmë një fustan, këmishë, veshje apo aksesor, sigurisht që kërkojmë produktin më cilësor të mundshëm. Por për fat të keq, ndonjëherë veshjet e blera tkurren dhe mblidhen që me larjen e parë. Për t’ju ndihmuar që të zgjidhni produkte të cilësisë së mirë, ju sugjerojmë këshillat në vijim:
Kontrolloni cilësinë e pambukut të copës duke e mbledhur atë me dorë.
Nëse copa zhubroset pas këtij veprimi, kjo tregon se ajo është spërkatur me një locion të veçantë për t’ia ruajtur formën. Rroba të tilla do të ngjajnë shëmtuar që pas larjes së parë.
Tërhiqeni pjesën e qepjes, për të parë boshllëkun që krijohet.
Produktet cilësore janë të qepura mirë dhe nuk krijojnë hapësira nëse i tërheq, ndërsa ato jocilësoret kanë qepje të dobët. 
Mos blini rroba me zinxhir të hapur!
Kur bleni rroba apo aksesorë, zgjidhni ato që e kanë zinxhirin metalik, të mbështjellë me një shirit cohe përreth. Zinxhirët e hapur plastikë thyhen dhe zakonisht janë tregues të cilësisë së dobët në pothuajse çdo produkt.
Shihni me kujdes etiketat përkatëse të produktit!
Pëlhurat natyrale, të tilla si: pambuku, mëndafshi apo leshi janë të forta dhe më të qëndrueshme sesa pëlhurat sintetike. Megjithatë, një pëlhurë që është 100% pambuk mund të rrudhoset shpejt pas larjes. Për këtë arsye, është mirë që të zgjidhni rroba me përbërje pëlhurash artificiale (5-30%), si: poliestër, najlon etj. Rroba të tilla nuk do të lëshohen pas larjes dhe do të mbesin në gjendje të mirë për një kohë të gjatë.
Kontrolloni me kujdes kopsat dhe vendet përkatëse të tyre!
Zakonisht, kur prodhuesit hedhin në qarkullim një produkt me cilësi të dobët, ata nuk u kushtojnë rëndësi detajeve të vogla. Prandaj, ju duhet t’i kontrolloni me kujdes rrobat përpara se t’i blini. Sigurohuni që rroba të ketë të gjitha kopsat dhe që vrimat të jenë të hapura dhe të qepura me kujdes anash tyre.
