Studimet e fundit tregojnë se psikologët e Zvicrës kanë rrogat më të larta nga të gjithë kolegët e tyre të vendeve të tjera. Megjithatë, këshillat e ekspertëve të shtrenjtë të këtij vendi nuk janë të ndryshme nga ato të psikologëve të tjerë. Nëse do të pyesnit dikë që sapo ka dalë nga studioja e një psikologu, për gjërat që i ka thënë ai, ka shumë gjasa të merrni një nga përgjigjet e mëposhtme. Kjo ndodh jo për shkak se këta njerëz nuk i kanë vërtet problemet që u janë përshkruar, por sepse përgjigje të tilla i shkojnë përshtat çdokujt.
Pra, pse të paguani shuma të mëdha parash, nëse mund t’i gjeni vetë përgjigjet që ju duhen?
Në vijim do të paraqesim disa nga këshillat më të shpeshta që do t’i dëgjoni në studion e një psikologu. Gjithsesi, ju kujtojmë se ndonëse këto këshilla mund të jenë efikase për pjesën më të madhe të njerëzve, prapëseprapë ka raste specifike kur është e nevojshme një qasje më e personalizuar.
Pjesa më e madhe e problemeve tuaja e kanë origjinën në fëmijëri – Fokusohuni kryesisht te prindërit tuaj. Si janë sjellë ata me ju? Nëse arrini të kuptoni arsyet e veprimeve të caktuara të tyre ndaj jush, atëherë do të mund t’i falni ata, çka do t’ju mundësojë të bëni një hap përpara drejt pranimit të vetvetes.
Një pjesë e problemeve janë vetëm në mendjen tuaj! – Dialogje të tilla me veten, si: “Duhej të përgjigjesha ndryshe…” apo “Ai/ajo veproi kështu sepse…” janë krejtësisht të pavlera. Ne nuk mund të shpjegojmë dot veprimet e të tjerëve. Ata mund të jenë rritur në një ambient ndryshe dhe kanë eksperienca krejt të ndryshme. Kështu, nëse përpiqeni të kuptoni arsyet që i çojnë këta njerëz për të vepruar në një mënyrë a një tjetër, ju do të përballeni me probleme që i sajoni nga mendja juaj.
Flisni më shumë për atë çka ndjeni vetë dhe jo për atë çka ndjejnë të tjerët – Kur akuzoni dikënd për diçka, ai do të përpiqet të mbrojë veten. Por nëse i shprehni ndjenjat tuaja të parët, atëherë ju i jepni mundësi tjetrit për ta korrigjuar gabimin. Në këtë mënyrë, ai ruan dinjitetin dhe e shpjegon më qartë veten.
Jepuni më shumë rëndësi gjërave tuaja sesa të të tjerëve – Të krahasosh veten me të tjerët është gjë e keqe. Gjithsecili ka kushtet, dijen, financat, dëshirat, aftësitë dhe arritjet e veta. Është mirë të frymëzohemi nga idetë e dikujt, por orvatja për të imituar jetën e tij, çon në shkatërrimin e vetë jetës tonë.
Dilni nga zona e rehatisë – Kjo këshillë është e vlefshme për të gjitha sferat e jetës. Nëse doni të gjeni një partner, të njiheni me njerëz, të ndërroni punë, apo t’i përkushtoheni pasionit, atëherë merruni me gjërat që ju interesojnë vërtet. Gjithçka që duhet të bëni për ta arritur këtë, është të dilni nga zona e rehatisë në të cilën jeni mësuar. /tesheshi.com/
