Këtë e ka konfirmuar kryeparlamentari Kadri Veseli, i cili ka ftuar Kryesinë e Kuvendit dhe shefat e grupeve parlamentare për takim menjëherë pasi ka përfunduar votimi për Ligjin për Buxhetin për vitin 2018.
Ashpër kundër një veprimi të tillë është shprehur numri një i Shteteve të Bashkuara të Amerikës në Kosovë, Greg Delawie. Ai ka thënë se SHBA-ja nuk dëshiron që Kosova ta shkatërrojë të ardhmen e saj.
“Nuk i kemi bërë gjithë ato përpjekje për suksesin e Kosovës, që tani ta shohim duke e shkatërruar të ardhmen e saj, duke shfuqizuar ligjin për Gjykatën Speciale. Ideja për të ndryshuar ligjin e Gjykatës Speciale mund të izolojë globalisht Kosovën. Ide e tmerrshme. Mos e ktheni orën mbrapa”, ka shkruar Delawie në rrjetin social “Twitter”.
Ai aktualisht raportohet se po zhvillon një takim me presidentin Thaçi për të kërkuar shpjegim nga ai dhe njëkohësisht për të kërkuar që të mos zhbëhet Specialja.
Kujtojmë se ditë më parë me iniciativën e Organizatës së Veteranëve të Luftës së Ushtrisë Çlirimtare të Kosovës, shumë qytetarë, por edhe ish-pjesëtarë të UÇK-së kanë nisur të nënshkruajnë një peticion ku kërkohet ndryshimi i këtij ligji. /tesheshi.com/
