Vitin e ardhshëm, nga mesi i prillit, kur fillon sezoni turistik, autoritetet veneciane do të vendosin tarifa hyrëse prej 10 euro për person për vizitorët njëditorë në qytet në ujë.
Tarifa, e cila do të paguhet edhe për një periudhë më të gjatë deri në fund të korrikut, nuk vlen për ata që qëndrojnë natën në qytet. Mysafirët e hotelit paguajnë taksën turistike në çdo rast.
Në pranverën e këtij viti, Venecia u bë qyteti i parë në botë me bileta për vizitorët njëditorë prej pesë eurosh për qëndrim në qytet nga ora 08:30 deri në orën 16:00. Rreth 485 mijë turistë sollën në arkën e qytetit 2.4 milionë euro.
Turistët që rezervojnë paraprakisht një qëndrim në Venecia për më shumë se tre ditë do të tarifohen me çmimin e vjetër prej pesë euro. Banorët vendas dhe fëmijët nën moshën 14 vjeç nuk paguajnë tarifa hyrëse.
Pagesa do të bëhet përmes një kodi QR në internet. Ata që kapen pa paguar tarifë përballen me gjobë deri në 300 euro.
Turizmi masiv sjell shumë të ardhura për qytetin, ndaj, bashkia e atyshme planifikon të përdorë të ardhurat nga tarifat për mirëmbajtjen e rrugëve, kanaleve dhe ndërtesave.
Me rreth 15 milionë vizitorë në vit, Venecia është një nga destinacionet turistike më të vizituara në botë.
Në pjesën e vjetër të qytetit jetojnë pak më pak se 50.000 banorë, ndërsa për mysafirët janë parashikuar më shumë se 50.000 shtretër.
Banorët vendas u shpërngulën jashtë qytetit
Shumë venecianë janë shpërngulur jashtë qendrës së qytetit, disa për të marrë me qira prona të shtrenjta, por shumë edhe nga shkaku se nuk mund të jetojnë më atje normalisht. Politikanët u përpoqën të mbyllnin spitalin e qytetit për ta, duke shpjeguar se qytetarët mund të shkojnë në një qendër klinike shumë më të madhe kilometra larg Venecias.
Venecia nuk është e para në këtë model të tarifës së hyrjes. Alto Adige, Tiroli i Jugut, një destinacion popullor turistik në Dolomites, në pranverën e vitit 2023 kufizoi numrin e turistëve që qiramarrësit lejohen të marrin, dhe vizitat në Liqenin Braies janë të mundshme vetëm me një rezervim.
Nga lindi ideja për biletën?
Në vitin 2019, qeveria italiane miratoi një propozim të paraqitur nga qeveria e qytetit të Venecias për të vendosur një tarifë hyrje prej pesë euro për udhëtimet ditore. Qëllimi ishte të inkurajoheshin disa udhëtarë ditorë që të rimendonin planet e tyre të udhëtimit, me idenë e frymëzuar pjesërisht nga ishujt e vegjël italianë si Ponzea që paguajnë një tarifë zbarkimi.
Propozimi u vonua gjatë pandemisë dhe u rilançua së fundmi. Duke filluar nga pranvera e vitit 2024, qeveria e qytetit të Venecias do të testojë tarifën e re gjatë një periudhe prove. Sipas Simone Venturini, këshilltare e qytetit për turizmin në Venecia, kjo periudhë prove do t’u lejojë politikëbërësve të eksperimentojnë me tarifën, me qëllimin përfundimtar për ta bërë atë të përhershme. /tesheshi.com/
