“Shërbimet në Aeroportin e Shkupit, përgjegjëse për kontrollet e sigurisë, kanë vepruar në mënyrë profesionale dhe në bazë të standardeve ndërkombëtare”.
Në këtë përfundim ka mbërritur Agjencia e Aviacionit Civil në Maqedoninë e Veriut, në raportin lidhur me incidentin e ndodhur në 1 gusht me presidenten e Kosovës Vjosa Osmani.
Agjencia tha se kishte rishikuar të gjitha dëshmitë që lidheshin me incidentin dhe se është konstatuar se shërbimet e aeroportit kanë vepruar në mënyrë profesionale.
Siç thuhet në raport, shërbimet aeroportuale u janë përmbajtur rregullave që zbatohen ndërkombëtarisht, duke mos lejuar anashkalimin e standardeve dhe procedurave, qoftë edhe nën presionin e personave që shoqërojnë pasagjerët.
“Refuzimi për të kryer kontrollet standarde të sigurisë me të njëjtët pasagjerë, sipas të dhënave, ka ndodhur edhe në vitin 2022 dhe 2023 kur kontrollet e sigurisë u pranuan vetëm pasi piloti i avionit kishte refuzuar të pranojë pasagjerë në avion pa u kryer një kontroll sigurie.”
Në deklaratë shtohet gjithashtu se ka pasur përpjekjet për të shfrytëzuar ngjarjen për përfitime politike dhe për të shtrembëruar të vërtetën.
Dhe menjëherë ka ardhur reagimi nga Prishtina, më saktë nga Presidenca kosovare.
“Republika e Maqedonisë së Veriut ka shkelur rregullat ndërkombëtare që aplikohen çdokund në botë duke kërkuar skanimin e telefonit të presidentes së një shteti tjetër, gjë që do të paraqiste potencial për cenim të sigurisë kombëtare”, tha Presidenca, duke shtuar se presidentja Osmani nuk është kthyer nga vizita e saj jashtë vendit përmes Aeroportit të Shkupit pasi ekipi i saj i sigurisë “ka vlerësuar se pas propagandës marramendëse nuk ekzistojnë as kushtet bazike të sigurisë për një gjë të tillë”.
