Dhjetë muaj pas nënshkrimit të marrëveshjes për ndërtimin e projektit “Durrës Marina”, emiratasi Mohamed Alabbar, koka e “EMAAR Group”. shpjegon në një intervistë ekskluzive për SCAN se është i kënaqur me ecurinë e punimeve.
Duke folur për emisionin “Insider”, ai shprehet se procesi po shkon jashtëzakonisht mirë.
“Në fakt, e kemi nënshkruar marrëveshjen me qeverinë vetëm këtë vit në shkurt. Ndaj, në 10 muaj shumë gjëra kanë ndodhur. Sepse pas nënshkrimit të marrëveshjes duhet të bëjmë projektimin, projektimin e detajuar, tenderat, kontratat.
Ndaj jam mjaft i kënaqur që brenda 10 muajsh ne jemi në kantier. Por shpresoj gjithashtu të mund të ecim më shpejt. Në anën e shitjeve, gjërat po shkojnë jashtëzakonisht shumë mirë. Në fakt, më mirë se sa pritshmëritë e mia. Kur vjen puna tek çfarë po shesim, dëgjo, kushdo mund të ndërtojë një 1+1 apo 2+1. Nuk është fare problem.
Por mendoj se duhet të shesim një stil jete. Pasi del nga apartamenti dhe bën një shëtitje me vajzën apo gruan tënde, si është kjo jetë? Si është xhiroja? Sa e sigurt është? Sa e pastër është? Si është peizazhi? Cilat janë shërbimet që ne ofrojmë atje? Ku është kafeneja? Ku është kopshti i vogël, parku? Ku është arti, dritat? Jam i fokusuar tek kjo”, shpjegoi ai.
Alabar vijoi më tej duke bërë një rezyme të vetes, për thelbin e tij në biznes:
“Jam në këtë biznes prej gati 29 vitesh. Kompani ime kryesore nxjerr gati dy miliardë dollarë fitim neto çdo vit. Por nuk mendoj se është çështje parash. Mendoj se është për ngazëllimin e të bërit gjëra dhe të mësuarit gjatë rrugës. Në çdo vend ku shkoj, si një fëmijë i vogël që takon njerëz e njeh ambientin. Por gjithashtu të jepet një shans për të ndryshuar jetët e njerëzve.
Ky është një shans i pabesueshëm. Dhe përpos kësaj fiton edhe para. Ndaj, jam thjesht një person i entuziazmuar që marr pjesë në evoluimin e jetës njerëzore dhe kjo është shumë emocionuese për mua”, u shpreh investitori emiratas, një ndër njerëzit më të rëndësishëm të biznesit ndërkombëtar, njeriu që mendjen e tij në ndërtimin e Dubait dhe ka ideuar e ngritur ndërtesën më të lartë në botë, Burj Khalifa.
“Durrësi do të jetë një version modern i Dubait”, thotë ai, duke shtuar: “Sepse, qytetet e mëdha ndërtohen”.
Më tej, Alabbar konfirmoi se ai do të jetë një nga banorët e Durrësit, së bashku me familjen e tij, duke thënë se dhe vetë ai ka rezervuar apartamente.
“Po, unë kam blerë disa hyrje për vete. Në dy godinat e para, kam apartamente atje. Edhe familja ime ka. Besoj vajzat e mia kanë gjithashtu apartamente këtu” tha Alabbar e theksuar se projekti “Durrës Yacht & Marina” nuk është projekti i vetëm që ka për Shqipërinë…/tesheshi.com/
