Presidenti rus Vladimir Putin planifikon të vizitojë Emiratet e Bashkuara Arabe dhe Arabinë Saudite të mërkurën, tha zëdhënësi i tij të martën, pa konfirmuar zërat për një vizitë të mundshme në konferencën e klimës COP28 në Dubai.
Një ditë më vonë, të enjten, Putin do të presë presidentin iranian Ebrahim Raisi në Moskë, njoftoi zëdhënësi i Kremlinit Dmitry Peskov.
“Udhëtimi do të zgjasë vetëm 24 orë”, tha Peskov për agjencinë ruse të lajmeve Interfax.
Çmimet e naftës
Vizitat e punës në të dy vendet do të fokusohen në marrëdhëniet dypalëshe, por sigurisht që do të diskutohet edhe për koordinimin e mëtejshëm të tregut të naftës, shtoi Peskov.
Këshilltari për politikën e jashtme të Putinit, Yuriy Ushakov njoftoi vizitat e punës të Putinit të hënën, por nuk specifikoi ditën apo nuk dha detaje shtesë.
Kohët e fundit, Organizata e Vendeve Eksportuese të Naftës (OPEC+), anëtare e së cilës është edhe Rusia, vendosi të ulë më tej prodhimin e naftës për të mbajtur çmimet të larta. Por pavarësisht këtij vendimi, çmimi i naftës vazhdon të bjerë, shkruajnë agjencitë.
I pyetur për këtë, Peskov shpjegoi se është e mundur që efekti i vendimeve të tilla të shihet më pas. Koordinimi i masave për stabilizimin e tregut sigurisht që do të vazhdojë, tha ai. /tesheshi.com/
