Të dielën, në Parkun Olimpik në Tiranë, ambasada e Katarit organzoi një event të veçantë në prag të nisjes së Botërorit të Futbollit në këtë vend arab të Gjirit, i pari që mbahet në vjeshtë-dimër.
Në fjalëmbajtjen e rastit, ambasadori Ali bin Hamad Al Marri, theksoi të vecantat e këtij Botërori në pritje, si eventi më i madh masiv pas pandemisë, si dhe atë çfarë do ofrojë vendi mikëpritës për tifozerinë nga e gjithë bota.
“Ne në Shtetin e Katarit, krenohemi me faktin që ky kampionat është turneu i parë Kupës së Botës i cili zhvillohet në botën arabe dhe në rajonin e Lindjes së Mesme në përgjithësi. Prandaj Shteti i Katarit është kujdesur që ky Botëror të jetë një eksperiencë e jashtëzakonshme dhe e pashembullt në historinë e futbollit, si dhe një mesazh paqeje dhe harmonie për të gjithë botën. Shteti i Katarit– nën direktivat e HH Babait Emir Sheikh Hamad bin Khalifa Al Thani dhe HH Sheikh Tamim bin Hamad Al Thani, Emiri i Shtetit të Katarit – ka derdhur që në vitin 2010 shumë mund e përpjekje për të garantuar gatishmërinë e plotë për pritjen e këtij eventi të madh sportiv global përpara afatit të përcaktuar, pavarësisht sfidave dhe vështirësive që ka kaluar.
Gjithashtu, Shteti i Katarit ka përdorur teknikat më të fundit të qëndrueshme dhe teknologjinë më të avancuar për ndërtimin e projekteve gjigante të Kupës së Botës, të cilat përfshijnë infrastrukturën, objektet sportive, ambientet e akomodimit, hotelet, transportin, etj. Stadiumet janë ndërtuar sipas standardeve më të larta ndërkombëtare për të qenë miqësorë me mjedisin; është ngritur një rrjet modern metroje dhe hekurudhash, është realizuar zgjerimi i aeroporteve dhe rrjetit të autostradave, krahas ndërtimit të zonave të reja të integruara brenda kryeqytetit Dohas, si dhe zona tifozësh, të cilat do të presin rreth 1.3 milion vizitorë, me çmime të përshtatshme për buxhetin e të gjithëve.
Për më tepër, ky Botëror karakterizohet nga distancat e shkurtra mes stadiumeve, gjë që u jep mundësinë tifozëve të ndjekin nga afër më shumë se një ndeshje në ditë, sikurse afërsia e distancave kontribuon gjithashtu për një kampionat më miqësor me mjedisin.
Botërori i Katarit do të jetë me standardet më të larta të sigurisë për tifozët dhe vizitorët gjatë periudhës së turneut. Për këtë qëllim, autoritetet në Doha bashkëpunojnë me një sërë organizmash ndërkombëtarë.
Këtu nuk mund të lë pa theksuar se Shteti i Katarit ka realizuar një sërë reformash të paprecedenta për rregullimin e tregut të punës dhe mbrojtjen e të drejtave të punëtorëve. Këto masa dhe reforma kanë marrë vlerësime nga organizatat ndërkombëtare kompetente, sidomos nga Organizata Ndërkombëtare e Punës dhe FIFA.
Ky turne, i cili do të zhvillohet nga 20 nëntori deri më 18 dhjetor, do të jetë eventi i parë madhor që bashkon dhe unifikon botën pas pandemisë së Covid-19. Ndaj dhe Shteti i Katarit i ka hapur dyert e tij për të gjithë botën dhe mirëpret të gjithë pa dallim nga mbarë bota, për të përjetuar një eksperiencë mbresëlënëse dhe unike në llojin e saj, me një gamë të gjerë aktivitetesh rekreative. Kudo që të shkojnë, vizitorët do të gjenden pranë një stadiumi, një atraksioni turistik apo muzeve të ndryshëm.
Prandaj, kam kënaqësinë t’ju ftoj ju dhe të gjithë popullin mik shqiptar për të ndjekur Kupën e Botës “FIFA Qatar 2022” dhe për të shijuar këtë ngjarje të mrekullueshme sportive dhe atmosferën e saj të veçantë”, tha ndër të tjera ambasadori i Katarit në Tiranë. /tesheshi.com/
