Nga pikëpamja ligjore, të hënën Kolegji Zgjedhor pritet të marrë një vendim mbi kushtetueshmërinë e aktit të Presidentit Meta, i cili ç’dekretoi datën e zgjedhjeve që vetë e kish dekretuar – 30 qershorin.
Por sipas PD-së, kjo nuk mund ndodhë. E nëse ndodh, Kolegji është nën presionin e Ramës.
“Kolegji Zgjedhor nuk merr dot në shqyrtim kushtetutshmërinë apo ligjshmërinë e Dekretit të Presidentit të Republikës. Edi Rama mund të kontrollojë vendimmarrjen e Kolegjit Zgjedhor, mund t’i shantazhojë gjyqtarët e këtij Kolegji me vetting, por nuk e ndryshon dot realitetin se data 30 Qershor nuk është më datë zgjedhjesh lokale në Shqipëri” tha Ivi Kaso, Sekretari për Çështjet Ligjore në selinë blu.
Sipas tij, e ashtu, siç pretendon dhe Meta, është Gjykata Kushtetuese që e shqyrton aktin e tij (por që mungon, ndonëse përkohshmërisht, një kartë që opozita e përdor kundër Ramës për të denoncuar Reformën në Drejtësi).
“Dekreti i Presidentit të Republikës për anullimin e 30
Qershorit si dita e zgjedhjeve lokale në Shqipëri është botuar në Fletoren Zyrtare. Ai është në fuqi dhe është i detyrueshëm për zbatim në të gjithë territorin e Republikës së Shqipërisë.
Kundër këtij Dekreti nuk ka asnjë ankimin as në Gjykatën Kushtetuese, sepse ajo nuk ekziston, as në gjykatat e tjera të vendit, përfshirë edhe Kolegjin Zgjedhor.
Edi Rama ka vetëm një rrugë për të shpallur të pavlefshëm Dekretin e Presidentit: ankimimin e tij në Gjykatën Kushtetutese të Republikës së Shqipërisë”, tha Kaso.
Ndërkohë, ditë më parë Rama ofroi këtë argument: “Gjykata kushtetuese e ka dhënë opinionin e vet disa vite më parë dhe ka nënvizuar se aktet e presidentit janë akte individuale, të cilat kur lidhen me zgjedhjet, adresohen në gjykatën përkatëse, që është Kolegji Zgjedhor dhe askund tjetër!”? /tesheshi.com/
