Nga Miradie Hasani
Ish-policit që shpëtoi Ziadin Selën iu morrën çelësat e Kuvendit nga deputetët e Gruevskit
Në ngjarjet e 27 prillit, kur turma e protestuesve hyri në Kuvendin e Maqedonisë, Fetah Alimi ishte në detyrë nga Reparti i Sigurimit në kuadër të MPB-së. Ai pati deklaruar se ka shpëtuar deputetin Ziadin Sela nga turma, të cilin e kishin rrahur për vdekje.
Krahas këtyre veprave, Alimi në muajin maj, nga Ministria e Punëve të Brendshme ishte pezulluar me arsyetimin se nuk ka qenë në krye të detyrës dhe tanimë është i larguar nga puna.
Fetah Alimi tani tani kërkohet nga policia dhe është në listën e 35 të dyshuarve për ngjarjet e 27 prillit në Kuvend.
Deri tani mësohet se më 27 prill, deputetët e VMRO-DPMNE-së të dyshuar për dhunën në Kuvend, ia morën nga dora çelësat ish-policit Fetah Alimi dhe hapën dyert për të hyrë turma në Kuvend.
Fetahu ndodhet jashtë Maqedonisë, gjegjësisht ai ka postuar fotografi në profilin e tij në facebook, me liderin Ziadin Sela. Nga pala mbrojtëse thonë se janë në kontakt më Fetahun, duke pohuar se nuk është në arrati. Kurse bashkëshortja e tij thotë se Fetahu është takuar me Selën në Zvicër.
Bashkëshortja e tij, Nurije Alimi theksoi se më 28 nëntor policia bastisi shtëpinë e tyre në fshatin Orizarë të Kumanovës duke e kërkuar Fetahun, ndërsa thekson se ai është i pafajshëm.
“Nëse kërkohet për atë që e ka shpëtuar Selën, Fetahu është plotësisht i pafajshëm. Pra, nëse për ndihmën që i ka dhënë Zijadin Selës, sipas tyre është gabim, atëherë për ata kjo qenka vepër absurde. Tjetër gjë të keqe nuk ka bërë, madje Fetahu ka qenë i rrahur atë natë. Ai rreth 20 minuta ka qenë pa vetëdije në sulmet e 27 prillit në Kuvend”, u shpreh Nurije Alimi .
Nga Prokuroria nuk japin informacione se për cilën vepër saktësisht kërkohet Fetah Alimi, por thonë se është në mesin e 6 të dyshuarve, të cilët janë ende të pakapshëm për autoritetet e rendit dhe të hetuesisë.
Ministri për punë të brendshme, Spasovski tha se nuk kanë lëshuar fletarrest ndërkombëtar, sepse sipas tij, të gjithë të dyshuarit janë brenda shtetit.
“Është dhënë urdhri për arrestimin e 35 të dyshuarve, por 12 persona ende janë në kërkim nga policia. Ata me siguri janë në territorin e Maqedonisë. Asgjë më shumë nuk mund të zbulojmë për ta, sepse rasti është në fazën e hetimeve dhe bëhet fjalë për informacione të klasifikuara”, u shpreh Oliver Spasovski.
Në ngjarjet e 27 prillit, kur turma e protestuesve hyri në Kuvend, Fetah Alimi ishte në detyrë i angazhuar nga Reparti i Sigurimit në kuadër të MPB-së. Ai në maj u pezullua, kurse tani është larguar nga puna. Në mesin e të dyshuarve për hapjen e portave është edhe Shefi i sigurimit të Kuvendit, Goran Gjoshevski, nën urdhër të të cilit, më 27 prill ka qenë edhe Fetah Alimi. Me kërkesë të Prokurorisë, Gjoshevskit iu shqiptua masa e paraburgimit prej 30 ditësh. /tesheshi.com/
