Piloti francez ka humbur betejën me jetën pas nëntë muajsh të kaluar në koma. Një aksident tragjik në garën e Japonisë, në pistën e Suzukës, tetorin e shkuar i shkaktoi atij goditje të rënda në kokë, nga të cilat piloti fatkeq i ekipit Marussia, i quajtur tani Manor F1, nuk mundi ta marrë veten kurrë.
Në atë garë në Japoni, shiu e pati bërë pistën tejet të rrëshqitshme, dhe makina e Jules Bianchi u përplas me 200 km në orë me një vinç që po tentonte të hiqte një tjetër makinë të dalë nga pista, pikërisht atë të Adrian Sutil-it.
Bianchi, i cili do të mbushte 26 vjeç muajin e ardhshëm, qëndroi për një kohë të gjatë në një spital në qytetin e tij, në Nisë, në jug të Francës. Si një paralajmërim për atë që do ngjiste vetëm pak orë më parë, para ca ditësh familjarët e tij patën njoftuar se gjendja e pilotit nuk kishte njohur asnjë përmirësim.
Bianchi u bashkua me Marussia-n në vitin 2013, dhe pilotoi në 34 gara, duke spikatur si një prej pilotëve më të talentuar në qarkullim.
Vdekja e tij vjen 21 vite pas aksidentit të tmerrshëm në Imola që i mori jetën tre herë kampionit të botës, një prej pilotëve më spektakolarë që ka parë bota e Formula 1-shit, Ayrton Senna-s. Aksidentit të 1 majit të 1994-s i pati paraprirë vdekja e austriakut Roland Ratzenberger vetëm një ditë më parë në provat zyrtare.
Një tjetër pilot, Felipe Massa, braziliani që drejtonte një Ferrari, i shpëtoi paq vdekjes në korrikun e 2009-ës, ndërsa në provat e garës së Hungarisë u godit nga një pjesë metalike e dalë nga makina e patriotit të tij, Rubens Barrichellos-s. Kaska në kokë e shpëtoi pilotin nga një vdekje e sigurt, por gjithsesi i la pasoja, ndërsa pilotit iu desh kohë të kthehej për të konkurruar vërtet në gara.
Ndërkaq, legjenda e Formula 1-shit, Michael Schumacher, është ende në një proces të gjatë rikuperimi pas një aksidenti me ski. Lajmet për të janë me pikatore, por nga ato pak që qarkullojnë dihet se gjermani nuk është dorëzuar ende, duke mbajtur gjallë një fijes shprese se një ditë mund t’i kthehet pak a shumë jetës normale. /tesheshi.com/
