Sekretari i Lëvizjes Vetëvendosje, Daradan Molliqaj në një konferencë të jashtëzakonshme për media së bashku me kryetarin Visar Ymeri sqaruan sulmin e mbrëmshëm në drejtim të aktivistit, Agron Kabashi përderisa ai po shoqëronte në banesën e tij pikërisht Molliqajn në lagjen Mati 1.
Molliqaj ka theksuar se janë të vetëdijshëm se pushteti kriminal ka filluar të ketë frikë nga mbështetja që ka marrë VV nga opinioni publik dhe, sipas tij, këto metoda të pushtetit janë metoda për të frikësuar ndryshimin në Kosovë.
“Aktivistët dhe përfaqësuesit e Vetëvendosje-s, nga ky pushtet shumë shpesh janë akuzuar që duam ta marrim me dhunë udhëheqjen, por këta që e kanë humbur legjitimitetin duan ta mbajnë të tillë. Përgjigja jonë, para se gjithash përpara qytetarëve është se do t’ua japin përgjigjen. S’ka asnjë sulm, asnjë dhunë dhe asnjë akt i këtyre bandave kriminale që të ndalojë ndryshimin në Kosovë, pasi ndryshimin nuk e bëjmë ne por qytetarët, dhe që Vetëvendosje është subjekti më i mbështetur në vend”, ka shtuar Molliqaj.
Në anën tjetër kryetari i VV-së, Visar Ymeri ka theksuar se sulmi i mbrëmshëm ndaj Agronit ka qenë i orientuar si sulm ndaj Dardanit dhe sigurisht që sulmi ndaj Dardanit është sulm i orientuar ndaj Lëvizjes Vetëvendosje.
Ymeri theksoi se sulmi i mbrëmshëm është konfirmim i dobësisë së këtij pushteti. /tesheshi.com/
