Nuk kanë të ndalur akuzat e Prokurorisë Speciale Publike mbi funksionimin e pushtetit në Maqedoni.
Në konferencën e sotme për shtyp kjo prokurori ka prezantuar edhe 4 raste të reja që kanë të bëjnë me keqpërdorimin e detyrës zyrtare dhe me evazion fiskal.
Gjatë kësaj konference, Prokurorja Katica Janeva tha se Drejtoria për të Ardhurat Publike dhe Ministria e Financave nuk kanë përmbushur detyrimet ligjore dhe kanë lejuar që institucione, përfshirë këtu edhe ministri të caktuara, të punojnë në kundërshtim me ligjet, duke mundësuar pasurimin e personave të caktuar në formë ilegale. Kështu, ajo akuzon se është bërë pastrim parash.
Interesante është fakti se edhe kësaj radhe 4 rastet(lëndët) që janë emëruar fillojnë me shkronjën “T”.
Në mesin e rasteve, gjenden rastet “Tabela”, “Treqind”, “Total” dhe “Tifani”.
Në rastin “Tabela”, bëhet fjalë për ndërtimin e një shkolle në rrethinën e Kërçovës, ndërtimi i të cilës është bërë pa pasur shpallje publike, ndërsa vlera e objektit të ndërtuar është 200 mijë euro. Andaj, drejtori i shkollës dyshohet për keqpërdorim të detyrës zyrtare.
Rasti i radhës, “Treqind”, ka të bëjë me ndihmësin e ministrit të brendshëm, i cili dyshohet se ka keqpërdorur detyrën zyrtare gjatë furnizimit të ministrisë me vetura. Në këtë rast, prokuroria pohon se i dyshuari ka dëmtuar buxhetin e shtetit për rreth 453 mijë euro.
Në rastin “Total”, një person fizik, pronar dhe menaxhues i agjencive të marketingut “Total”, “Media Maks” dhe “Total Mecia Center”, dyshohet se i është shmangur pagesës së taksave, edhe atë në vlerë prej rreth 121 mijë aurove.
Në rastin “Tifani”, dyshohet një person fizik, pronar i agjencisë “Smart” dhe komanisë “Smart Center”. Në rastin konkret, dyshohet se kompanitë kanë kryer evazion fiskal në vlerë prej 37.634 eurove. Përpos kësaj, nga prokuroria akuzojnë se e dyshuara gjithashtu iu është shmangur pagesave të tatimeve në vlerë prej 16.924 euro.
Nga Prokuroria Speciale kërkuan nga Kuvendi që të rishqyrtojë edhe rregullativën ligjore dhe të mundësojë funksionim normal të kësaj prokurorie, në interes të qytetarëve. /tesheshi.com/
