Tratativat e vështira për zgjedhjen e kreut të SHISH: do të jetë grua, kryespiunja e re shqiptare?

Nesër përfundon mandati 5 vjeçar i kreut të shërbimit sekret shqiptar, Visho Ajazi Lika.

I dekretuar nga ish-presidenti Nishani në vitin 2012, sapo mori detyrën e kreut të shtetit, inxhinieri i informatikës që gjysmën e karrierës së tij e ka në SHISH dhe gjysmën në Universitet, u sulmua jo pak nga një pjesë e mazhorancës së majtë, por që çuditërisht ka drejtuar pa zhurmë dhe probleme me Kryeministrin Edi Rama.

Madje ai e ka falënderuar një herë publikisht me rastin e faljes së “Shtëpisë së Gjetheve”, por edhe i ka dhënë një medalje në emër të qeverisë.

Ilir Meta, Presidenti i ri i Republikës, mësohet se ka ditë që ka zhvilluar konsultime për çështjen e emërimit të kreut të ri të shërbimit sekret shqiptar.

Dhe si për të rritur pak dozën e teorive konspirative, një delegacion i Komisionit të Senatit Amerikan për Shërbimet Sekrete, është takuar me Presidentin Ilir Meta, më pak se para 10 ditësh, ku është folur shumë për rolin ë Shërbimit Informativ Shtetëror në bashkëpunim me CIA-n dhe shërbimet sekrete të NATO-s dhe vendeve partnere.

Sipas Kushtetuts, kreu i SHISH dekretohet nga Presidenti i Republikës me propozim të Kryeministrit.

Në rastin e Fatos Klosit dhe Bahri Shaqirit, u krijua precedenti i një kryespiuni që nuk pëlqehet nga kryeministri.

Klosin kërkuan ta shkarkojnë Fatos Nano dhe Pandeli Majko, por kërkesa u refuzua nga Presidenti i atëhershëm i Republikës, Rexhep Meidani.

Bahri Shaqirin kërkoi ta shkërkojë Kryeministri Sali Berisha, pas 21 janarit, por kërkesa u refuzua nga Bamir Topi kur drejtonte shtetin shqiptar.

Me precedentin e Visho Ajazit, u krijua një risi, që u shpreh nga Bujar Nishani, i cili deklaroi se emëroi një njeri të përshtatshëm dhe të preferuar nga kryeministri, pasi është normale që një drejtues shërbimi të ketë një gjatësi vale me kreun e qeverisë.

Sipas të gjitha gjasave, por edhe deklaratave të tij publike, Ilir Meta nuk do të firmosë lehtë një emër të propozuar nga Edi Rama për shef të shërbimit sekret.

Por siç mësohet, kryeministri ka zgjedhur ndërmjetësimin në këtë detyrë, duke deleguar një njeri që qëndron prej vitit 2013 midis PS-së dhe LSI-së si mes Shilës dhe Karidbës.

Dhe ky njeri nuk mund të jetë askush tjetër përveç “legjendarit” Baba-Taku, i cili edhe këtë herë është zgjedhur deputet në listat e PS-së, por që pritet të jetë një njeri i LSI-së, ku është edhe anëtar i kryesisë.

Spartak Braho, ka gjasa që edhe këtë legjislaturë të emërohet si kryetar i komisionit Parlamentar të Sigurisë, ndaj dhe ka nisur të diskutojë me qetësi një kompromis institucional për kreun e ri të SHISH.

Siç mësohet, Kryeministri preferon që të emërojë në krye të shërbimit sekret një grua.

Dhe kjo nuk është një grua e zakonshme, por njeriu që për 4 vite të qeverisë së Edi Ramës, ka qenë ndërmjetësja ndërmjet tij dhe Visho Ajazit për çështjet e informacionit të klasifikuar.

Bëhet fjalë për 37 vjeçaren Suela Bedeni, e cila është Inspektorja e Përgjithshme e SHISH, apo njeriu i kryeministrit në shërbimin sekret.

Inspektori nuk bën drejtimin operativ të institucionit por realisht di shumëçka ndodh në shërbimin sekret.

Por kandidatura e Bedenit nuk shikohet me preferencë nga Ilir Meta, i cili mësohet se ka zhvilluar konsultime të rëndësishme me njerëz të njohur në fushën e sigurisë kombëtare.

Mundësia e një rizgjedhje të Visho Ajazit, megjithëse ai ka pasur marrëdhënie të mira me partnerët përjashtohet, pasi ka pasur mjaft përplasje me mazhorancën, por edhe është akuzuar se është “qytetari dixhital” i Sali Berishës në më shumë se një rast.

Por, një tjetër kandidaturë potenciale, është edhe ajo e Helidon Bendo, aktualisht nëndrejtor i SHISH-it dhe me një karrierë mbi 20 vjeçare në rradhët e shërbimit sekret shqiptar. Bendo u emërua në postin e nëndrejtorit të SHISH pas largimit të Ylli Alushit, ndërsa ka mbaruar disa trajnime në SHBA dhe vende të tjera, partnere të Shqipërisë.  Madje emërimin në kupolën drejtuese të SHISH, Bendo e morri pasi përfundoi një nga trajnimet e rëndësishme, pranë një prej partnerëve kryesorë të SHISH.

Mësohet se Edi Rama, pritet ta shtyjë propozimin zyrtar drejtuar Metës për në shtator, atëherë kur edhe të ketë mbyllur formimin e qeverisë.

Gjthsesi vetë Presidenti Ilir Meta, nuk ka sesi të vendosë vetë për kreun e SHISH, pasi e drejta e propozimit i takon Kryeministrit.

Vetëm nëse Meta mban Visho Ajazin. Por atij i ka përfunduar mandati dhe situata mund të shkaktojë krizë kushtetuese.

/tesheshi.com/