Njerëzit të cilëve u është ndaluar hyrja në SHBA për shkak të një ndalimi udhëtimi të vendosur nga ish-presidenti Donald Trump mbi 13 vendet me shumicë muslimane dhe afrikane, mund të aplikojnë për aplikime të reja për viza, tha Departamenti i Shtetit.
Presidenti i ri Joe Biden hoqi të ashtuquajturin ndalim të Trump-it ndaj muslimanëve në 20 janar, ditën e parë të mandatit të tij, duke e quajtur atë një “njollë në ndërgjegjen tonë kombëtare”.
Ned Price, një zëdhënës i Departamentit të Shtetit, tha se njerëzit, kërkesat për vizë të të cilave u refuzuan deri më 20 janar 2020, mund të paraqesin aplikime të reja dhe të paguajnë përsëri paratë.
Ata, aplikimet për vizë të të cilëve u refuzuan më ose pas 20 janarit kanë mundësinë të kërkojnë rishqyrtim, pa paraqitur një kërkesë të re, dhe ata nuk kanë pse të paguajnë asgjë, shtoi Price.
Që nga dhjetori 2017 dhe konfirmimi i një versioni të rishikuar të ndalimit fillestar të udhëtimit nga Gjykata e Lartë e SHBA, rreth 40,000 njerëz kanë mbetur pa të drejtë hyrjeje në token amerikane, sipas të dhënave të Departamentit të Shtetit.
Në fund të mandatit të Trump, vendet, shtetasve të të cilave iu ndalua hyrja në Shtetet e Bashkuara ishin Mianmari, Eritrea, Irani, Kirgistani, Libia, Nigeria, Koreja e Veriut, Somalia, Sudani, Siria, Tanzania, Venezuela dhe Jemeni. /tesheshi.com/
