Kreu i grupit parlamentar të PD-së, Edmond Spaho, ka komentuar idenë e qeverisë për mbledhjen e taksave për biznesin e vogël, të cilën e ka quajtur një dështim.
Një barrë e tillë për biznesin, thotë Spaho ka sjellë performancën më të dobët në rajon në grumbullimin e të ardhurave. Sipas tij, zgjidhja e vetme e kësaj situate është ulja e taksave, një administratë e ndershme në Tatime e Dogana dhe trajtimi i barabartë para ligjit e detyrimit për të gjithë, shkruan Shekulli.
Kreu i grupit të PD-së shprehet se biznesi i vogël është i vetmi gjenerator i punësimit, prandaj Spaho, kundërshton legjislativa që ndëshkojnë atë.
Kryeministri Edi Rama theksoi se opozita është vënë në mbrojtje të informalitetit. Aksionet ndaj biznesit të vogël, janë ndihmë apo barrë?
Është një aksion i nisur prej kohësh por që nuk po jep rezultate. Është barrë për biznesin dhe ka marrë natyrën e represionit dhe gjobëvënësit. Megjithëse ka ndërmarrë këto masa në buxhet të shtetit prapë mblidhet më pak. Sot jemi në nivelin e vitit 2008, Kjo e shpjegon dhe nxitimin e qeverisë për të futur TVSH-në te bizneset e vogla. Nuk po bëhen nisma ligjore, nuk po lejojnë biznesin as të marrë frymë, me qëllim që qeveria të marrë më shumë taksa. Kjo ndodh në një kohë kur biznesi po kalon periudhë të vështirë dhe ne e dimë që biznesi i vogël është i vetmi gjenerator i punësimit. Sot kur e dimë se Shqipëria e ka problem punësimin, në vend se të ndihmohet biznesi me masa nga më të ndryshme, ai përkundrazi po rëndohet dhe me legjislativa të tilla. Një tjetër masë ndëshkuese që i jep përgjigje këtij aksioni të dështuar që panisur është dhe vendosja e TVSH-së, e cila rezultoi me rritjen e çmimit dhe me uljen e konsumit. Kjo detyrimisht sjell më pak të ardhura për bizneset dhe në fund të fundit dhe për buxhetin.
Ju thoni se nga ky lloj aksion veç barrës për biznesin e vogël nuk ka asnjë përfitim?
Barrë ka qenë tërë kohës për bizneset. Veprimet e tilla si gjobat dhe ndëshkimet kanë ndikuar negativisht në aktivitetin e biznesit të vogël dhe vetëm se e kanë çuar drejt falimentit. Këtë e tregoi më së miri legjislativa që ndërmori dy vite më parë.
Ka një debat për largimin e misionit të FMN-së. Në gjykimin tuaj a janë plotësuar kushtet që të FMN të largohet?
Në kushtet ku është ekonomia shqiptare ka nevojë që të ketë një autoritet që ta kontrollojë, sepse arbitrariteti në veprime në ekonominë tonë nga qeveria ka qenë i dukshëm. Mjafton të kujtojmë veprimet që ka ndërmarrë duke bashkuar tatimet me doganat, apo iniciativa një miliardë euro për gjoja investime në infrastrukturë. Të gjitha këto shkojnë në kurriz të ekonomisë. FMN-ja u shpreh kundër bashkimit të tatimeve me doganat pasi përmes këtij sistemi do të mblidhen më pak të ardhura, këtë e ka treguar në të ardhmen ndërmarrja e veprimeve të shkuara. Plus këtu paralajmërohet risku i madh që paraqet programi 1 miliard euro, kjo e artikuluar se do të arrihet përmes iniciativës publiko-private. Kjo do të rrisë borxhin publik me 7 për qind. Për këto arsye, përfshi dhe të tjera nisma, është e domosdoshme që kjo qeveri të ketë kontroll dhe një gardian që të mos lejojë këtë qeveri të ndërmarrë veprime aventureske. /tesheshi.com/
