Ndërsa vëmendja mediatike është e përqëndruar te kampi Berisha me kandidat për Tiranën Belind Këlliçin, është për t’u kujtuar se PD-ja zyrtare ka tjetër kandidat për Tiranën, lazaratasin Roland Bejko, një anti-berishist i thekur.
Fjala është pra për atë gjysmë tjetër të PD-së pas përçarjes së madhe, drejtuar nga Alibeaj pas dorëheqjes së Bashës, e cila sigurisht nuk ka asnjë problem me ndërkombëtarët, ndryshe nga PD-ja e Berishës, që m’u për shkak të këtij të fundit injorohet tërësisht nga fronti euroatlantik.
SHBA dhe Britania e Madhe e kanë shpallur Berishën “non grata” dhe rrjedhimisht nuk pranojnë të njohin asnjë produkt politik që rrjedh prej tij. Pra, asnjë kandidat i Rithemelimit, edhe nëse fiton, nuk do të njihet nga aleatët më të ngushtë ndërkombëtarë të Shqipërisë.
Së fundi, Roland Bejko ka postuar ekipin e ngushtë të tij, duke shkruar:
“Gati programi për Tiranën
Merr jetë programi për Bashkinë e Tiranës, 2023-2027. Një program i hartuar nga ekspertët më të mirë për çështjet lokale, të cilët dua t’i falendëroj nga zemra për kontributin e tyre të paçmuar. Në ditët në vijim do të trokasim në dyert e çdo familjeje për të shpjeguar nga afër se alternativa jonë është alternativa më e mirë për qytetin. Përkushtimi, ndershmëria dhe aftësia na diferencon nga kundërshtarët tanë”, shprehet ai.
Por te Bejko çështja është, ajo që dhe komentohet më së shumti: pse nuk kandidon për Gjirokastrën, pra aty prej nga është dhe ku ka jetuar pjesën më të madhe të jetës, por duhet të kandidojë për Tiranën?! /tesheshi.com/
