Stephen O’Brien, shefi i OKB-së për çështjet humanitare, i bëri një panoramë të errët para Këshillit të Sigurimit gjendjes humanitare në botë.
Më shumë se 20 milionë njerëz në katër vende luftojnë me urinë, ndërsa bota përballet me krizën më të madhe humanitare që nga fundi i Luftës së Dytë Botërore.
Sipas O’Brien-it, kriza më e madhe humanitare është në Jemen, ku dy të tretat e popullsisë kanë nevojë për ndihmë, e më shumë se shtatë milionë banorë vuajnë nga uria.
Zyrtari i lartë i OKB-së bëri thirrje për një ndërveprim kolektiv global për të shmangur katastrofën. Ai ka kërkuar financime të shpejta për Jemenin, Sudanin e Jugut, Somalinë dhe për verilindjen e Nigerisë.
“Për të qenë të qartë, ne mund ta shmangim një zi buke. Jemi gati, pavarësisht rreziqeve. Por kemi nevojë tani për fonde të mëdha,” i deklaroi Stephen O’Brien Këshillit të Sigurimit të OKB-së. /tesheshi.com/
