Zëvendës/ndihmës sekretari i Shtetit për Evropën dhe Azinë, Hoyt Brian Yee, ishte sot në Tiranë për të diskutuar mbi krizën politike në vend. Përveç takimeve me krerë të shtetit e opozitës ai zgjodhi të drekojë me një grup gazetarësh.
Një detaj interesant ra në sy gjatë ditës së sotme që kulmoi me vizitën e zyrtarit të Departamentit Amerikan të Shtetit në Tiranë. Në orarin e drekës ai zgjodhi ta kalonte me një grup gazetarësh, nga ku dha dhe mesazhet më të forta drejtuar politikës dhe qytetarëve shqiptarë.
Zëvendës/ndihmës sekretari i Shtetit për Evropën dhe Azinë, Hoyt Brian Yee nuk zgjodhi të ketë afër tij gazetarët e ekraneve, analistët që dalin në emisione debati e shkruajnë çdo ditë duke mbrojtur ose duke kritikuar opozitën dhe qeverinë. Yee kishte pranë tij gazetarët e thjeshtë të terrenit, ata që raportojnë lajmin aty ku ai ndodh.
Në foton e shpërndarë nga ky takim duken disa vajza dhe djem të rinj, që janë në fakt gazetarët e televizioneve kryesore të lajmeve.
Zgjedhja e zyrtarit amerikan nuk është e rastësishme, duke pasur parasysh konfliktualitetin që ekziston sot në Tiranë mes gazetarëve dhe anshmërisë së tyre të hapur me njërën apo tjetrën palë në debatet publike. Ky është një vlerësim për punën e gazetarëve të thjeshtë, ata të vërtetët që rrinë në terren dhe raportojnë ditën dhe natën zhvillimet politike.
Pikërisht me ta ai ndau dhe qëndrimet më të rëndësishme që u shpërndanë pastaj me vërtetësi prej tyre në media./Tesheshi.com
